Armlur.am-ի փոխանցմամբ, Մարալիկի քաղաքապետ Արտակ Գեւորգյանը իրենց ասել է, որ մանկատան 10 շրջանավարտների համար Մարալիկում նախատեսված շենքն արդեն շահագործման են հանձնել. «Թեեւ շենքերը հանձնվել են շահագործման, սակայն իրենք հստակ տեղյակ չեն, թե դրանք տրամադրվելո՞ւ են, արդյոք, մանկատան շրջանավարտներին»:
«Մարալիկի քաղաքապետը որեւիցե առնչություն չունի այնտեղի շահառուների մասով: Քաղաքապետը ընդամենը շինարարական աշխատանքների ինչ-որ մասով է, ու այս խմելու ջրի խնդիրը, երբ որ առաջացավ, դրա մասով զբաղվում է: Շահառուների ցանկն արդեն ունենք: Այնտեղ միայն մանկատան շրջանավարտներ չեն, այնտեղ կան նաեւ միայնակ տարեցներ: Եթե շենքը հանձնվեր, ապա համապատասխան իրավական գործընթաց կլիներ, չէ՞ , պայմանագրեր, պայմանագրերի կնքում, կլուսաբանվեր»,- Aravot.am-ի հետ զրույցում ասաց աշխատանքի եւ սոցիալական հարցերի նախարար Արթուր Գրիգորյանը՝ հավելելով, որ քաղաքապետի ասածն իրականությանը չի համապատասխանում:
Նրա խոսքերով, Մարալիկի շենքերն ամբողջությամբ պատրաստ են, շահագործման հանձնելուն խանգարում են անկանխատեսելի խնդիրները. «Խմելու ջրի խնդիր առաջացավ եւ եթե չլիներ այդ խնդիրը, ապա դեռ 2 ամիս առաջ պետք է այն շահագործման հանձնվեր: Սակայն, երեկվա իմ թարմ տեղեկություններով, պարզվել է, որ արդեն լուծվել է խմելու ջրի խնդիրը ու համոզված եմ, որ առաջիկա 10-15 օրերի ընթացքում Մարալիկի տները վերջնականապես կհանձնվեն շահառուներին»:
Արփինե ՍԻՄՈՆՅԱՆ
