ԱԺ ֆինանսավարկային հանձնաժողովի փոխնախագահ, ՀՅԴ խմբակցության պատգամավոր Արծվիկ Մինասյանն այսօր հայտարարել էր, որ 2003-2008 թվականներին, երբ ՀՅԴ-ն կոալիցիայի կազմում էր եւ գործում էր հիմնականում սոցիալական ոլորտում, երկրում աղքատության ցուցանիշը կազմում էր 26%, որը կոալիցիայից ՀՅԴ-ի դուրս գալուց հետո դարձավ 56%: Համանման տոկոսային հարաբերություններով, Մինասյանը համեմատություններ է արել նաեւ կենսաթոշակների, անապահով ընտանիքների, աղքատության, արտագաղթ-ներգաղթի մասով:
Aravot.am-ի խնդրանքով անդրադառնալով սույն տեսակետին, ՀՀԿ խորհրդարանական խմբակցության ղեկավար Գալուստ Սահակյանը դաշնակցական Արծվիկ Մինասյանի արտահայտած այդ տեսակետը որակեց այսպես. «Սովորական, նախընտրական բանաձեւ է, մենք դրան ծանոթ ենք: Բոլոր ընտրություններից առաջ, բոլոր այն խնդիրները, որոնցում դրական լուծման իմաստով հիմնական դերակատարում է ունեցել Հանրապետական կուսակցությունը, այլ կուսակցությունների կողմից վերագրումների տեսքով է գնում: Ես դա բնական եմ համարում»:
Իսկ Մինասյանի վկայակոչած բուն թվերն էլ դիտարկելով՝ Գալուստ Սահակյանը հեգնեց. «Երեւի թե համաշխարհային ճգնաժամի հիմնական դերակատարները եղել են հայաստանյան ուժերը: Է, բնական բան է, էն ժամանակ քիչ պիտի լինեին այդ ցուցանիշները, որովհետեւ տնտեսական ճգնաժամ չէր, Հայաստանն էլ երկնիշ տնտեսական աճ ուներ, որի բնորոշիչը հիմնականում Հանրապետական կուսակցությունն էր: Տնտեսական ճգնաժամից հետո, ինչքան էլ փորձեցինք հայաստանյան իրականության մեջ մեղմել ճգնաժամի ազդեցությունը, բյուջեի սոցիալական ուղղվածությունը պահպանվեց մինչեւ վերջ, բայց բնական է, որ աղքատությունը պետք է ավելի շատ լիներ»:
Այնպես որ, Գալուստ Սահակյանի կարծիքով, ՀՅԴ-ն ընդամենը զբաղված է «քաղաքական PR-ով», ինչն «իրականության հետ աղերսներ չունի»:
Կարդացեք նաև
Իրականությունը, Սահակյանի բանաձեւով, այսպիսին է. «Այո, այն թվականներին աղքատությունն ավելի ցածր ցուցանիշ ուներ, հետո բարձրացավ` համաշխարհային քաղաքական, տնտեսական բնութագրերի հետեւանքով»:
Նելլի ԳՐԻԳՈՐՅԱՆ
