Հրազդանում քաղաքապետի ընտրությունները խորհրդարանական ընտրություններից առաջ իշխանությունների տեխնոլոգիաներն օգտագործելու փորձադաշտ էին. նման կարծիք այսօր «Փաստարկ» ակումբում ներկայացրեց «Ժառանգություն» խմբակցության պատգամավոր Արմեն Մարտիրոսյանը. «Տեխնոլոգիան այս էր, որ տեղամասում պետք է անցկացվի նորմալ ընտրություն, իսկ բոլոր խախտումները՝ տեղամասերից դուրս»: Պարոն Մարտիրոսյանի խոսքերով, Հրազդանում հիմնական արձանագրված խախտումները՝ ընտրակաշառքի, վարչական ռեսուրսների եւ քաղաքացիներին ահաբեկելու դեպքերն էին . «Այս երեք գործոններն աշխատեցին Հրազդանում, եւ հենց այս գործոններն են, որ իշխանական թեկնածուին առավելություն տվեցին, բայց կարծում եմ, որ ընդդիմությունն էլ պակաս ձայներ չհավաքեց: Հրազդանում շատ բարձր մակարդակի վերահսկողություն էր, նման բան չէի տեսել»:
Պատգամավորի դիտարկմամբ, այն, որ իրավապահ մարմինները չեն արձանագրել ընտրակաշառքի բաժանումները՝ «Դա նշանակում է, որ քաղաքական հրաման է եղել, որ որեւէ մեկն ընտրակաշառքին չի հետեւելու: Հրազդանի ընտրություններից ընդդիմությունը դասեր պիտի քաղի, որովհետեւ պարզվում է՝ այն տեղերում, որտեղ ընդդիմությունը համագործակցում է, արդյունքները լրիվ այլ են լինում, քան այն տեղամասերում, որտեղ համագործակցությունը թույլ է: Գալիք ընտրություններին հնարավորինս պետք է մեծացնել համագործակցությունը, որ տեղամասերում հնարավոր լինի՝ ապահովել անհրաժեշտ վերահսկողությունը»:
Ամփոփելով երկու օր առաջ Հայաստանի ավելի քան 30 համայնքներում անցկացվող ՏԻՄ ընտրությունները, պատգամավորը եզրահանգեց, որ այս անգամ էլ ընտրությունները չանցան ՀՀ նախագահի, վարչապետի ու ԱԺ նախագահի հայտարարած բանաձեւի ներքո. «Անընդհատ բարձրաձայնում էին՝ ազատ, արդար, թափանցիկ ընտրություններ, բայց խոսել այդպիսի ընտրությունների մասին եւ ունենալ ընտրակաշառքի այդքան գործածում, վարչական ռեսուրսի այդպիսի օգտագործում միանշանակ չի կարելի»:
Պարոն Մարտիրոսյանը վստահ է, որ խորհրդարանական ընտրություններին քաղաքական ուժերը կգնան ավանդական սցենարով: Պայքարը կլինի ոչ թե ընդդիմության ներսում, այլ իշխանության եւ ընդդիմության միջեւ. «Տեխնոլոգիան կա, արդեն պարզ է՝ ինչ է լինելու խորհրդարանական ընտրություններին»:
Կարդացեք նաև
Արփինե ՍԻՄՈՆՅԱՆ
