Որսորդները 100.000 դրամ կստանան գայլերին որսալու դեպքում: Կառավարությունը գայլերի ակտիվության դեմն առնելու համար այսօր որոշեց թույլատրել 200 գայլի որսը: Գայլերի թույլատրելի որսը կտեւի մինչեւ ապրիլ: Բնապահպանության նախարար Արամ Հարությունյանն ասաց, որ գայլերի ակտիվությունը պայմանավորված է ձյան առատությամբ: Նախարարը չի կարծում, որ կառավարության այս որոշումը բնապահպանների դժգոհությունը կառաջացնի, որովհետեւ նախապես բանակցել են ու քննարկել խնդիրները. «Գայլերը տնտեսություններին, ազգաբնակչությանը մեծ անհանգստություն են պատճառում: Նման քայլով այս բնագավառում իրավիճակը կմեղմենք»:
Նա ասաց, որ գայլերն ակտիվ են հատկապես Սյունիքում, Շիրակում ու Գեղարքունիքում: Պարոն Հարությունյանի տվյալներով հանրապետությունում այժմ կա մոտ 600 գայլ. «Մեր հաշվարկները ցույց են տվել, որ գայլերը արագ զարգացող են, հետեւաբար՝ 200 գայլի որսը խնդիր չէ»:
Արփինե ՍԻՄՈՆՅԱՆ
