Լսումներում կարեւոր բացահայտումներ հնչեցին։ Մի կողմ եմ թողնում բոլոր բերված փաստարկներն ու հակափաստարկները, դրանք, իհարկե, գոյության իրավունք ունեն, հասկանալի է՝ քաղաքական բանավեճ է։ Բայց իշխանության երկու ներկայացուցիչ՝ պետաիրավական հանձնաժողովի նախագահ Դավիթ Հարությունյանը եւ արդարադատության նախարար Հրայր Թովմասյանը շատ ուշագրավ բացահայտումներ արեցին։
Օրինակ՝ Հրայր Թովմասյանը բաց տեքստով ասաց, որ այսօր գործող մեծամասնական ընտրական համակարգը ձեռնտու է ուժեղ իշխանության կուսակցությանը, որովհետեւ հնարավորություն է տալիս ավելի ամուր պահպանել վերջինիս դիրքերը։ Սա կարեւոր է լսել կառավարության անդամի շուրթերից, քանի որ, երբ մենք ենք դա ասում, սա կարող է որպես ընդդիմադիր կուսակցության ենթադրություն ընկալվել։ Բայց եթե իշխող ուժն է խոստովանում, որ մեծամասնական ընտրակարգը նպաստում է իր իշխանության պահպանմանը, որ այն իրենց է ձեռնտու եւ չեն ուզում զիջել, սա արդեն ուրիշ բան է։ Իսկ Դավիթ Հարությունյանը ավելի հեռուն գնաց եւ ասաց ավելի ուշագրավ մի բան։ Պնդելով, որ ՀՀԿ-ն քաղաքական կամք ունի չգնալու ընդդիմության առաջարկած փոփոխությանը, որովհետեւ եղած համակարգն ավելի կայուն վիճակ է ստեղծում իշխանության համար եւ ավելի ձեռնտու է նրան, նա արեց մի հետաքրքիր հայտարարություն՝ իրական բարեփոխումները հնարավոր է անել միայն այն պարագայում, եթե մեկ կուսակցության մեծամասնություն է ձեւավորված, իրենն է ամբողջ իշխանությունը եւ կոալիցիայի կարիք Էլ չկա։ Ըստ Դավիթ Հարությունյանի, սա է կայուն իշխանության երաշխիքը։ Եվ միայն այդպիսի իշխանությունը կարող է իրական բարեփոխումներ իրականացնել։
Վահան ՀՈՎՀԱՆՆԵՍՅԱՆ
«Երկիր»
