Ալ. Սպենդիարյանի անվան օպերայի եւ բալետի ազգային ակադեմիական թատրոնում այսօր կայացած «Հույսի նավակ» խորագրով մանկական բարեգործական համերգի ընթացքում, որին մասնակցում էր ՀՀ առաջին տիկին, «Նվիրիր կյանք» բարեգործական հիմնադրամի պատվավոր նախագահ Ռիտա Սարգսյանը՝ հնչեց նրա հեղինակած երգը:
Համերգը նվիրված էր ուռուցքային հիվանդություններով երեխաների պաշտպանության միջազգային օրվան, իսկ ողջ հասույթը փոխանցվելու է «Նվիրիր կյանք» բարեգործական հիմնադրամին:
Համերգի վերջում Ռիտա Սարգսյանը հետնաբեմում զրուցել է Սայաթ-Նովա երաժշական դպրոցի սաների հետ, որոնք տիկնոջ նվագակցությամբ կատարեցին երգը:
Ռիտա Սարգսյանին մոտեցել է մի աղջիկ, ասել, որ իր անունը Նարե է, եւ հարցրել, թե գիտե՞ք ես ում աղջիկն եմ, Էդուարդ Շարմազանովի աղջիկն եմ: Նարեն առաջին տիկնոջը բողոքել է, որ «պապային կարոտում է, նա ուշ է տուն գալիս»: Ռիտա Սարգսյանը համաձայնել է ԱԺ փոխնախագահի դստեր հետ եւ ասել, որ իր ամուսինն էլ է ուշ գալիս տուն: Սա չի սփոփել 9-ամյա Նարեին ու նա շարունակել է տրտնջալ, որ հայրը խոստացել էր այս համերգին ներկա գտնվել, բայց խոստումը չի կատարել: «Պապաս Ղարաբաղում է, դրա համար չեկավ»,- տիկին Ռիտային պարզաբանել է Նարեն: «Ոչինչ աղջիկս, գործն է այդպես, իմ ամուսինն էլ պիտի գար, բայց գործեր ուներ` չեկավ»,– երկխոսությունն ավարտել է Ռիտա Սարգսյանը:
