«Հաջորդ խորհրդարանում չի լինելու մեծամասնական, բայց մտածում եմ, որ այսօր միայն համամասնականով խորհրդարան ձեւավորելը արդյունավետ չէ, որովհետեւ մեծամասնականներից շատերը, որքան էլ խորհրդարանի հետ կապ չունեն, ամեն դեպքում իրենց ընտրատարածքներում ինչ-որ խնդիրներ են լուծում»,- այսօր «Սլաք» ակումբում նման տեսակետ ներկայացրեց ՀՀԿ անդամ Մենուա Հարությունյանը: Նա այն կարծիքին է, որ միայն 100 տոկոսով համամասնականին անցնելով, խորհրդարանի հետ կապ չունեցող պատգամավորների դեմն առնել չի լինի.« Նրանք ձեւը կգտնեն ու այլ կուսակցության ընտրացուցակներով կգան: Այստեղ քաղաքացու դերն էլ է մեծ, իմ անցկացրած հարցումների արդյունքում ընտրատարածքներում պատգամավորին ոչ մեկ չի ճանաչում, բայց նա նույն ընտրատարածքում 6 անգամ ընտրվում է»:
Ապա , դիմելով «Ժառանգություն» խմբակցության պատգամավոր Արմեն Մարտիրոսյանին, հարցրեց.«Դուք համաձայն չե՞ք, որ ոչ թե մեծամասնականները վերացնենք, այլ մեծամասնականով ընտրվողների որակը փոխենք, որ նրանք աշխատեն»: Պարոն Մարտիրոսյանն էլ առաջարկեց չաշխատող պատգամավորների մուտքը ԱԺ չպայմանավորել միայն ընտրողների գործոնով. «Պետք է քաղաքացուն թույլ տալ արտահայտել իր քաղաքական կամքը, եթե սոցիալական այս իրավիճակում նրան ահաբեկում են, վախեցնում աշխատանքից հանելու առումով, էլ ընտրողն ի՞նչ անի»: Պարոն Հարությունյանն էլ կարեւորեց խորհրդարանում սերնդափոխության անհրաժեշտությունը՝շեշտելով, որ ձեւական փոփոխությունը ոչինչ չի փոխի. «Եթե ուրիշի փոխարեն կոճակ սեղմող կամ ոչինչ չասող ու չանող պատգամավորի փոխարեն գալու է ավելի երիտասարդ ու ուրիշի տեղը կոճակ սեղմող պատգամավոր ու ոչինչ չանի, դրանից ոչ մի բան չի փոխվի: Եթե պոտենցիալ ավազակ նախարարին պետք է փոխարինի պոտենցիալ ավազակ երիտասարդ նախարարը, դրանից կրկին ոչ մի բան չի փոխվի»: Պարոն Մարտիրոսյանն էլ հավելեց, որ այս հարցում համամիտ է ՀՀԿ-ական գործընկերոջ հետ:
Ինչ վերաբերում է ՏԻՄ ընտրությունների ընթացքում ընտրակաշառքների բաժանման մասին պարոն Մարտիրոսյանի փաստարկներին, պարոն Հարությունյանը հակադարձեց. «Եթե Հրազդանում կեղծիքներ լինեին, Սասուն Միքայելյանն իրեն կճղեր: Եթե կեղծիքներ են եղել, ինչո՞ւ է Սասուն Միքայելյանը լռում: Հանրապետականը կեղծիքներ աներ՝ Իջեւանում էլ կաներ, բայց մենք այնտեղ պարտվեցինք, չէ՞»:
Վերջում էլ հավելեց, «Գնալու ենք ազատ, անկախ ընտրությունների ճանապարհով: Հայաստանը սպառել է նոր մարտի մեկ տեսնելու ռեսուրսը , այլեւս ընտրությունը կեղծելու ռեսուրս չունի»:
Կարդացեք նաև
Արփինե ՍԻՄՈՆՅԱՆ
