«Հանրապետություն» կուսակցությունում այսօր տեղի էր ունենում քաղխորհրդի նիստ: Aravot.am-ի ունեցած տեղեկություններով կուսակցության քաղխորհրդի անդամները քննարկել են Հայ ազգային կոնգրեսի համամասնական ցուցակում իրենց ներկայությունը բացառելու, ինչպես նաեւ մեծամասնական կարգով ընտրություններին մասնակցելուց հրաժարվելու հարցերը: Պատճառն, իբրեւ այն է, որ կուսակցության այն անդամները, ովքեր ընդգրկվել են ՀԱԿ համամասնական ցուցակում, տեղ են զբաղեցրել բավականին հետին հորիզոնականներում, ինչն էլ առաջ է բերել «Հանրապետություն» կուսակցության քաղխորհրդի անդամների դժգոհությունը:
Այս առիթով մեկնաբանություններ խնդրեցինք կուսակցության նախագահ Արամ Սարգսյանից: Վերջինս ասաց. «Այդ լուրից իրականությանը համապատասխանում է միայն այն, որ «Հանրապետություն» կուսակցության քաղխորհուրդը քննարկում է առաջիկա ԱԺ ընտրություններում կուսակցության մասնակցության քանակի, ձեւի տարբերակները: Մնացած բոլոր հարցերը զուտ քննարկման փուլում են: Եվ երկրորդ` մենք այս երկրում, մեր երկրում, որեւէ մեկից չենք նեղանում: Ովքեր «Հանրապետություն» կուսակցությունը գիտեն, գիտեն ինձ, ապա գիտեն, որ մենք նեղացող չենք: Մեր երկրում մեզ որեւէ մեկը չի կարող նեղացնել: Մանավանդ, որ ՀԱԿ-ում դեռեւս քննարկվում է ցուցակի ձեւավորվման սկզբունքները, հետեւաբար բաշխումներ եւ նեղացվածություններ չեն կարող լինել, քանի որ մենք էլ չգիտենք, թե որ տեղերում ենք»:
Մեր զրուցից քիչ անց «Հանրապետությունն» այնուհադերձ հայտարարություն տարածեց: Այդ առիթով էլ Արամ Զավենիչը հավելեց. «Մեր այս քայլն ապացույցն է նրա, որ ՀԱԿ-ը չի մասնակցում ընտրություններին լոկ մանդատի համար, քանի որ հասարակության մեջ նման խոսակցություններ կան»:
Նելլի ԳՐԻԳՈՐՅԱՆ
Կարդացեք նաև
TAGS-
