«Հայաստանում գիտության ոլորտում կուտակվել են շատ խնդիրներ: 27.000 գիտաշխատողներից այստեղ մնացել են 5000-ը»,- այսօր «Գոլդեն Թյուլիպ» հյուրանոցում լրագրողների հետ հանդիպման ժամանակ հայտարարեց ֆիզմաթ գիտությունների դոկտոր, պրոֆեսոր, ՀՀ ԳԱԱ թղթակից-անդամ Արթուր Իշխանյանը: Գիտնականը մտավախություն ունի , որ կարող ենք կորցնել տարիների ընթացքում Հայաստանի ձեռք բերած գիտական դիրքն ու ավանդույթները: Նրա փաստմամբ, խնդիրները շատ են, թեկուզ հենց գիտական սարքերի ու տեխնիկայի ներկրման ու մաքսազերծման հետ կապված դժվարությունները, գիտնականների ցածր աշխատավարձերը:
Պարոն Իշխանյանի կարծիքով իշխանությունները քայլեր չեն ձեռնարկում, չեն խթանում գիտության զարգացմանը. «Իշխանությունը հայտարարում է, որ գիտությունն է երկրի ներուժը, բայց իրենց արածը չի համընկնում ասածին»:
«Պահանջում ենք գիտության ֆինանսավորման բարձրացում».- Ֆեյսբուքյան նախաձեռնության անդամ Տիգրան Հարությունյանն էլ հայտարարեց, որ ՀՀ. նախագահի տրամադրած 100 միլիոն դրամը ծախսվելու է Հայաստանում եւ արտերկրում կոնֆերանսների կազմակերպման, մասնակցության, գիտական ծրագրերի աջակցման եւ հայ հայտնի գիտնականների անունով մրցանակներ տրամադրելու վրա:
Մոսկվայի ֆիզիկա-տեխնիկական ինստիուտի բակալավր Հայկ Իշխանյանը լրագրողների հետ հանդիպման ժամանակ հայտարարեց, թե ցանկանում է որ ԳԱԱ խորհրդի նիստերին ներկա լինեն լրագրողներ, նիստը տեսագրվի, ցուցադրվի, որպեսզի պարզ լինի՝ ով ով է:
Կարդացեք նաև
Արթուր Իշխանյանն էլ իշխանություններից պահանջեց գիտությանը տրամադրվող ֆինանսների ավելացում ու դրանց արդյունավետ կառավարում, նաեւ՝ մասնավոր անձանց աջակցում:
Արամ ԱՐԱՐԱՏՅԱՆ
