Նախկին ՕԵԿ–ական պատգամավոր Գագիկ Բաղդասարյանը երեկ ԱԺ հայտարարությունների ժամին հերթագրվել Էր՝ ելույթ ունենալու համար։ Բայց երբ հերթը հասավ, նա հայտարարեց, որ հանում է ելույթը։ «Ո՞ւմ համար ելույթ ունենայի, նենց էին փախել, բա չտեսա՞ք դահլիճում ովքեր էին նստած։ Ես ասացի, որ բան ունեի ասելու, բայց քանի որ չկան այն մարդիկ, ովքեր պետք է լսեն, չեմ կարծում, որ ճիշտ կլինի այդպես խոսել, որովհետեւ կստացվի, որ հետեւից ինչ–որ բան եմ խոսում։ Ես ուզում էի դեմքներին ասեի, որ ամեն ինչ այնպես չէ, ինչպես դուք եք ուզում, որովհետեւ քաղաքականությունը բիզնես չէ, իսկ դուք քաղաքական բիզնեսմեններ եք, վերջ տվեք ձեր անպարկեշտություններին։ Եվ էլի շատ բան ունեի ասելու»,- մեզ հետ զրույցում ասաց Բաղդասարյանը։ Նա ուզում էր իր խոսքն ուղղել ՕԵԿ–ին, որի շարքերը լքեց օրեր առաջ։ Մյուս քառօրյայում Բաղդասարյանն իր ասելիքը կասի, եթե ՕԵԿ–ը շարունակի իր հասցեին հայտարարություններ անել։ Ըստ նրա, ՕԵԿ ղեկավարներն ասում են՝ փորձելու են իրեն ջնջել. «Ես հենց դա էի ուզում պարզել, թե այդ ոնց են ինձ ջնջելու, չտեսա՞ք, որ չեք կարող։ Ինձ դրել են մատիտով գրած մի հատ հետքի տեղ, որ հեսա ռետինը վերցնելու են ու ինձ ջնջեն։ Դժվար է»։ Հարցին՝ ՕԵԿ–ից դուրս գալուց հետո բիզնեսում խնդիրներ չե՞ք ունեցել, նա պատասխանեց. «Իմ բիզնեսին չեն կարող ոչինչ անել, որովհետեւ ես հարկերը ժամանակին ոչ թե վճարում եմ, այլ մի բան էլ ժամանակից շուտ եմ վճարում։ Իմ նպատակն է, որ այդ մարդիկ այլեւս չունենան այդ հնարավորությունը՝ իմ նմաններին մատների վրա խաղացնել եւ թալանել»։
«Հայկական ժամանակ»
Կարդացեք նաև
