Հայ կամավորականների համախմբում միավորումը ՀԱԿ քաղխորհրդում ներկայացնող Սամվել Հարությունյանն այսօր մամուլի ասուլիսում հայտարարել էր. «ՀԱԿ անդամ 18 ուժերից 13-ն արդեն համաձայնության էին եկել, բայց ստիպված եմ հայտարարել, որ ՀՀՇ–ի եւ նրան աջակցող 2-3 ուժերի կողմից վիժեցվեց կոնսենսուսի հասնելու բացարձակ մեծամասնության ձգտումը»: Որպես ՀՀՇ-ի համախոհ ուժեր, բանախոսը նշել էր ՍԴՀԿ-ի, ՀԼԿ-ի եւ «Այլընտրանք» հասարակական-քաղաքական նախաձեռնության անունները:
Aravot.am-ին այդպես էլ չհաջողվեց հնչեցված մեղադրանքների առիթով պարզաբանումներ ստանալ նշյալ քաղաքական միավորներից: Մեր բոլոր զանգերն անպատասխան մնացին: Միայն ՍԴՀԿ ատենապետ Լյուդմիլա Սարգսյանն ասաց, որ առայժմ չի ցանկանում մեկնաբանություններ անել: Դիտարկմանը` չե՞ք կարծում, որ լռությունը թյուրընկալումների առիթ կտա, տիկին Սարգսյանը կարճ պատասխանեց. «Չէ, հիմա մեկնաբանություններ չեմ անի»:
ՀԱԿ անդամ 4 կուսակցությունների` պաշտպանության նախկին նախարար Վաղարշակ Հարությունյանի ղեկավարած «Ազգային վերածնունդ», Գառնիկ Մարգարյանի ղեկավարած «Հայրենիք ու Պատիվ», Սոս Գիմիշյանի ղեկավարած «Քրիստոնյա-ժողովրդական վերածնունդ» եւ Ժիրայր Սեֆիլյանի ղեկավարած Հայ կամավորների համախմբում միավորման, Կոնգրեսի նախընտրական դաշինքում ընդգրկվելուց հրաժարվելու մասին Aravot.am-ը ՀԱԿ մամուլի խոսնակ Արման Մուսինյանից դեռ երկու օր առաջ էր մեկնաբանություններ խնդրել: Չնայած «վաղը մեկնաբանելու» խոստմանը, պարոն Մուսինյանն արդեն երկու օր է` չի պատասխանում մեր հեռախոսազանգերին:
Նելլի ԳՐԻԳՈՐՅԱՆ
Կարդացեք նաև
