Այսօր հրավիրված մամուլի ասուլիսի ընթացքում Տարածաշրջանային հետազոտությունների կենտրոնի տնօրեն Ռիչարդ Կիրակոսյանը հայտարարեց, որ Պուտինի մասնակցությամբ ԼՂՀ հակամարտության լուծման գործընթացում փոփոխություններ չեն լինի. «Մեդվեդևի օրոք գործընթացն ավելի ակտիվ փուլում էր: Նախագահը կարող էր անգամ իր անձնական ժամանակից տրամադրել գործընթացի կարգավորման, նախագահներ՝ Սարգսյանի և Ալիևի համար հանդիպումներ կազմակերպելու համար: Կարող էր ժամեր տրամադրել նրանց հետ սուրճ, թեյ խմելու, նրանց ձեռքը սեղմելու համար: Պուտինի ոճն այլ է: Նա ժամանակ չի զոհի նախագահներ Ալիևի և Սարգսյանի հանդիպումների կազմակերպման համար, չի ցանկանա ձեռք սեղմել, այլ կձգտի ձեռք ջարդել և ճնշումներ գործադրել Ադրբեջանի և Հայաստանի վրա: Պուտինն անգամ համբերություն չի ունեցել նստել իր նախարարների հետ և բանակցել: Նա որոշումներն ընդունում է և հրամայում»:
Այս հարթության վրա համեմատելով իրավիճակը Ռոբերտ Քոչարյանի նախագահության օրոք և այժմ՝ Ռ. Կիրակոսյանը նշեց. «Սերժ Սարգսյանը Քոչարյանը չէ: Քոչարյանն անձնական հարաբերություններ ուներ Պուտինի հետ, Սերժ Սարգսյանը՝ ոչ: Ուստի Պուտինն անձնական ճնշումներ չի գործադրի Սերժ Սարգսյանի վրա»:
Տաթև ՀԱՐՈՒԹՅՈՒՆՅԱՆ
