Կենտրոնական ընտրական հանձնաժողովը այսօր արտահերթ նիստի ընթացքում քննեց ու մերժեց ՀԱԿ կենտրոնական շտաբի ղեկավար Լեւոն Զուրաբյանի դիմումը, որով պարոն Զուրաբյանը պահանջում էր վերացնել Հանրապետական կուսակցության կողմից իրականացվող նախընտրական գործունեության իրավախախտումները: Դիմումում մասնավորապես նշված էր, որ նախընտրական քարոզարշավը դեռ չսկսած, ՀՀԿ-ն հանրապետության տարբեր շրջաններում ձեւավորել է ընտրական շտաբեր, որոնց վրա տեղադրված ցուցանակները ներառում են կուսակցությանը քվեարկելուն միտված կոչեր, մասնավորապես՝ կարգախոսը:
ԿԸՀ-ն որոշեց , որ անգամ դիմումում ներկայացված գնահատականները պայմանականորեն ընդունելու դեպքում էլ՝ որեւէ իրավախախտում առկա չէ, որը կարող է դիտարկվել նախընտրական քարոզչության համար սահմանված կարգի խախտում: Հանձնաժողովի նախագահ Տիգրան Մուկուչյանն ասաց, որ իրականացված վարույթի շրջանակներում պարզվել է, որ ՀՀԿ-ի կարգախոսը չի կարող դիտարկվել կուսակցությանը կողմ կամ դեմ քվեարկելու կոչ:
Կենտրոնական ընտրական հանձնաժողովի նիստին ներկա Լեւոն Զուրաբյանի լիազոր ներկայացուցիչը չառարկեց այս որոշման դեմ ու չներկայացրեց լրացուցիչ հիմնավորումներ:
Արփինե ՍԻՄՈՆՅԱՆ
