Թեեւ պաշտոնաթող գեներալ Մանվել Գրիգորյանը ընդամենը երկու ամիս առաջ իր հարցազրույցներում հավաստիացնում էր, որ ոչ ինքը, ոչ էլ իր ընտանիքի անդամները քաղաքական դաշտ ներխուժելու հավակնություններ չունեն, սակայն հենց ինքը հայտնվեց ՀՀԿ համամասնական ցուցակի «թոփ 20»-ում:
Հիշեցնենք, որ վերջին երկու տարիների ընթացքում անընդհատ խոսվում էր, որ Մանվել Գրիգորյանը ցանկանում է կնոջը պատգամավոր դարձնել թիվ 20 ընտրատարածքից, իսկ Էջմիածնի քաղաքապետ որդուն՝ Կարենին, թիվ 19-ից: Վերջին շրջանում խոսակցություններ էին շրջանառվում նաեւ, որ գեներալի որդին՝ Կարեն Գրիգորյանը, «աչք ունի» Արմավիրի մարզպետի աթոռին:
Թեեւ Գրիգորյանների ընտանիքի մամուլի խոսնակը՝ Վարդան Վարդանյանն Aravot.am-ի հետ վերջերս մի զրույցում հերքել էր այդ տեղեկությունը, փորձեցինք այդ առիթով լսել նաեւ Արմավիրի մարզպետ Աշոտ Ղահրամանյանի կարծիքը: Մարզպետից հետաքրքրվեցինք՝ տեղյա՞կ է նման խոսակցություններից եւ եթե ՀՀԿ-ն որոշի, որ ինքը պետք է պաշտոնը զիջի Մանվելի որդուն՝ ինչպե՞ս կարձագանքի: «Ինձ նշանակում է հանրապետության վարչապետը՝ հանրապետության նախագահի համաձայնությամբ, եթե կգտնեն, որ ես լավ չեմ աշխատում… հո մարդը մշտապես իր պաշտոնը չի՞ զբաղեցնում: Բայց նման խոսակցություն կուսակցությունում երբեւիցե չի եղել, եւ ես համոզված եմ, որ իմ աշխատանքից ղեկավարությունը դժգոհ չէ»:
Նելլի ԳՐԻԳՈՐՅԱՆ
Կարդացեք նաև
