«Ցինիզմ, գենդերային անհավասարության ցայտուն օրինակ, պահանջում եմ, որ Ռուբեն Հայրապետյանն ինձնից ներողություն խնդրի»,- այսօր հայտարարեց թիվ 1 ընտրատարածքում մեծամասնական ընտրակարգով առաջադրված Գայանե Առուստամյանը: Հայտարարությունը կապված էր նույն ընտրատարածքում առաջադրված թեկնածու Ռուբեն Հայրապետյանի այն պնդման հետ, թե Գայանեի բանավեճի հրավերը չի ընդունում, քանի որ վախենում է, որ Գայանեն իրեն կճանկռի:
Գ. Առուստամյանն անդրադարձավ նաև թիվ 7 ընտրատարածքում երեկ տեղի ունեցած միջադեպին, երբ Սվաճյան 44 հասցեում հարձակվել էին իրենց վրա: Ըստ նրա՝ շենքի շքամուտքի առաջ 12-15 հոգուց բաղկացած «հրոսակախումբը» հարձակվել է իրենց վրա, հարվածել, բռնության ենթարկել, ՀԱԿ-ից Բաբկեն Գարոյանին ևս ծեծի են ենթարկել, նրա քիթն է ջարդվել: Գ. Առուստամյանը ԿԸՀ-ին պահանջում է արձագանքել միջադեպին և հանել Սամվել Ալեքսանյանի թեկնածությունը, որը ևս առաջադրված է թիվ 7 ընտրատարածքում: Գ.Առուստամյանը վստահ է, որ հրոսակախումբը ուղղորդված է հենց Ս. Ալեքսանյանի կողմից, քանի որ նկարահանված կադրերում երևում է նաև նրա վարորդը, իսկ «հրոսակախմբի» անդամները հայտարարել են, որ իրենք ՀՀԿ-ական են և ունեն իրենց ընտրած թեկնածուն: Գ. Առուստամյանը եզրահանգում է. «Կատարվածի համար պատասխանատու է Սերժ Սարգսյանը, քանի որ նա հայտարարել է, որ ընտրությունները անցկացվելու են իրավահավասար պայմաններում, այնինչ ականատես ենք լինում հերթական կեղծիքին և իրավունքի ոտնահարման երևույթին»:
Պատգամավորի թեկնածուն նկատեց, որ եթե բռնությունները նախկինում տեղի էին ունենում հենց ընտրության օրը, ապա այս տարի դա մեկնարկել է ավելի վաղ:
Կարդացեք նաև
Գ. Առուստամյանի հայտարարությունը ընդունվել է ՀՀ ոստիկանության կողմից, սակայն նա, իր լրագրողական փորձից ելնելով, չի ապավինում ոստիկանությանը:
Նա հանցավոր համարեց ժողովրդի անտարբերությունը, երբ, օրինակ, իրենց աչքի առաջ մարդկանց են բռնության ենթարկում, սակայն բոլորը լռությամբ հետևում են:
Պատգամավորի թեկնածուն սպասում է նաև ԵԺԿ-ին անդամակցած երկու կուսակցությունների՝ ՕԵԿ-ի և «Ժառանգության» արձագանքին:
Տաթև ՀԱՐՈՒԹՅՈՒՆՅԱՆ
