«Նախ մենք կմաքրենք Գագիկ Մինասյանին: Նրան պետք է ձերբակալել, որ եթե ինքը լինելով իշխանության 10-15 տարի, այդ գողերին չի ձերբակալել»,-այսպես արձագանքեց ՀԱԿ անդամ, Հայաստանի նախկին վարչապետ Հրանտ Բագրատյանը, երբ այսօր «Հայելի» ակումբում Aravot.am-ը նրան խնդրեց ՀԱԿ մեկնաբանել ՀՀԿ անդամ Գագիկ Մինասյանի երեկ հայտնած այն կարծիքը, թե «գողությունն ու ավազակապետությունը ձևավորվել և սերմանվել է առաջին նախագահի ղեկավարման տարիներին և հենց ՀՀՇ-ի մեջ: Եվ այսօր, երբ նրանք խոսում են մաքրության և բարոյականության մասին, նախ պետք է իրենց ներսը մաքուր պահեն»:
ՀԱԿ անդամը նաեւ ավելացրեց. «Եթե մենք գանք իշխանության եւ Սերժենք ու Գագիկենք 5 տարի հետո ընդդիմություն լինեն, Գագիկ Մինասյանին գող կհայտարարենք, կգաք կթքեք երեսիս, կասեք` եթե գող է, բռնեիր: Տվյալ դեպքում գողը Գագիկ Մինասյանն է, եղա՞վ, դե թող բռներ: Մազութի գործ էին մոգոնել, տեսան խայտառակ են լինում, ի՞նչ մազութ, ի՞նչ բան»:
Այսօր լրագրողների հետ հանդիպման ժամանակ պարոն Բագրատյանը վստահեցրեց, որ ՀԱԿ-ի հանրահավաքները խոչընդոտվում են զանազան ձեւերով՝ սկսած մարդկանց արգելելով հանրահավաքին մասնակցելուց մինչեւ սոցիալական նպաստներից զրկելու սպառնալիքով:
Գնահատելով բնակչության մասնակցությունը ՀԱԿ-ի հանդիպումներին, պարոն Բագրատյանը նախ նշեց, որ բնակչության 15 տոկոսը լքել է Հայաստանը, հետո ավելացրեց. «ՀԱԿ-ի հանդեպ խորը հիասթափություն կա, մարդիկ ասում են` ո՞նց չեք կարում վերցնեք իշխանությունը: Պարտավոր եք վերցնել: Ասում են` պարզապես վերցրեք: Խորը հիասթափություն կա, անկեղծ»:
Կարդացեք նաև
Նելլի ԲԱԲԱՅԱՆ
