«Ես չեմ էլ իմանում դրա շենքը որտեղ է:Ես ոչ մի կապ չունեմ այդ շենքի հետ, ոչ խնդիր ունեմ այդ շենքի հետ կապված, ոչ ապրում եմ այդ շենքում, ոչ ուզում եմ Հմայակ Հովհաննիսյանի հետ որեւէ առնչություն ունենալ»,- Aravot.am-ի հետ զրույցում այսպես արձագանքեց Սյունիքի մարզպետ Սուրեն Խաչատրյանը` Քաղաքագետների միության նախագահ Հմայակ Հովհաննիսյանի արած հայտարարությանը: Ինչպես տեղեկացել ենք, այսօր հրավիրած ասուլիսում Հմայակ Հովհաննիսյանը հայտարարել էր, որ իր աշխատողները տեսել են, թե ինչպես է Սյունիքի մարզպետ Սուրեն Խաչատրյանը շոյում իր գրասենյակի պատերը: Նա վստահեցրելէր, որ Սուրեն Խաչատրյանը ախորժակ ունի տիրանալ այդ գրասենյակին` գործարար Սենիկ Ջուլհակյանի միջոցով եւ նրա անվան տակ: Սուրեն Խաչատրյանն ասաց, որ Սենիկ Ջուլհակյանին ճանաչում է. «Ճանաչում եմ, գորիսեցի է, բայց նման բան չկա, թե ուզում եմ իր միջոցով շենքին տիրանալ»:
Ինչ վերաբերում է Հմայակ Հովհաննիսյանի այն խոսքերին, թե «Սուրեն Խաչատրյանի ոտը Երեւանից կտրելու եմ, նա իրավունք չունի Երեւանով անգամ քայլելու»` Սուրեն Խաչատրյանն ասաց. «Խորհուրդ տվեցեք այդ մարդուն, թող բուժման գնա, էդ մարդը երեւի բուժման կարիք ունի: Ինքն ո՞վ ա, որ իմ ոտը կտրի, իրա հերն էլ անիծած: Ինքը իրանից ի՞նչ ա ներկայացնում, որ իմ ոտը կտրի»: Մեր դիտարկմանը, որ գիտեք երեւի, նա ԲՀԿ-ի ցուցակում է ընդգրկված` պարոն Խաչատրյանը նետեց. «Հետո՞ ինչ, ում ցուցակում ուզում է ընդգրկված լինի»:
Սյունիքի մարզպետը մի քանի անգամ վստահեցրեց, որ իսկապես Քաղաքագետների միության շենքի հետ որեւէ կապ չունի:
Հռիփսիմե ՋԵԲԵՋՅԱՆ
Կարդացեք նաև
