ՀՀ նախագահի երիտասարդական մրցանակաբաշխությունը, որն անցկացվում է 2000 թվականից, պետք է լինի առաջին հերթին լավագույն երիտասարդ արվեստագետներին խրախուսելու միջոց: Անցյալ տարի մրցույթի «Երգեցողություն» անվանակարգում մրցանակակիր չգրանցվեց, իսկ հիմնական հավակնորդ, Ալ. Սպենդիարյանի անվան օպերայի եւ բալետի ազգային ակադեմիական թատրոնի մեներգիչ Հայկ Տիգրանյանը (բաս), 27 տարին լրանալու կապակցությամբ, այլեւս չի կարող մասնակցել հիշյալ մրցույթին: Այս օրերին օպերային երգիչը Հայաստանը ներկայացնում է Կորեայի Ժողովրդադեմոկրատական Հանրապետությունում 28-րդ անգամ անցկացվող «Ապրիլյան գարուն» միջազգային մրցույթ-փառատոնում, որտեղ «Երգեցողություն» անվանակարգում մասնակցում է եւս 150 երգիչ: Նախօրեին Ազգային օպերային թատրոնից լուր ստացանք, որ Հայկ Տիգրանյանը արժանացել է 2-րդ մրցանակի, 1-ինը Իտալիայի ներկայացուցիչն է, իսկ 3-րդ մրցանակը կիսել են Բելառուսի եւ Լեհաստանի ներկայացուցիչները:
«Առավոտը» կապվեց Հայկ Տիգրանյանի հետ: Մեր զրուցակիցը հայտնեց, որ Կորեայում տոնական տրամադրություն է՝ նշվում է հանրապետության հիմնադիր Կիմ Իր Սենի 100-ամյակը. «Մրցույթ-փառատոնին մասնակցում են նաեւ հրավիրված արտիստներ Մալայզիայից, Կուբայից, Ֆինլանդիայից, Մոնղոլիայից, Գերմանիայից, Բուլղարիայից, նույնիսկ Ամերիկայից եւ այլ երկրներից, որոնք Կորեայի հետ չունեն դիվանագիտական հարաբերություններ»: Հայկը նշեց նաեւ, որ ինքը միակ օպերային երգիչն էր, որը տեղի սիմֆոնիկ նվագախմբի հետ ելույթ է ունեցել Փխենյանի օպերային թատրոնում, կատարելով Գրեմինի արիան՝ Չայկովսկու «Եվգենի Օնեգին» օպերայից: Երգչի փոխանցմամբ՝ ինքն այդ պատվին արժանացել է ժյուրիի առաջարկով: Հարցին՝ հնարավոր չէ՞ր հանդես գալ արիայով հայկական որեւէ օպերայից, Հայկն ասաց. «Բացի մրցութային օրերից, կորեացի կոնցերտմայստերի հետ ունեցել եմ 5 համերգ, իսկ առաջին փուլում կատարել եմ Դավիթ-Բեկի արիան՝ Տիգրանյանի «Ալմաստ» օպերայից»: Այս օրերին Փխենյանում են նաեւ մենեջերներ տարբեր օպերային թատրոններից, ուստի հետաքրքրվեցինք՝ եղե՞լ են համագործակցության առաջարկներ: «Ոչ պաշտոնական առաջարկներ ստացել եմ Մինսկի, Քիշնեւի օպերային թատրոններից, իսկ աշնանը Լիպեցկում կայանալիք ավանդական դասական փառատոնի բացմանը երգելու հրավեր եմ ստացել»,- հայտնեց Հայկ Տիգրանյանը: Մեր զրուցակիցը նեղսրտեց, որ մրցույթ-փառատոնի բացմանը, երբ պետությունները ներկայանում էին պատվիրակություններով, ինքը մենակ էր՝ «Հայաստան» ցուցանակի տակ:
ՍԱՄՎԵԼ ԴԱՆԻԵԼՅԱՆ
«Առավոտ» օրաթերթ
