Այսօր կեսօրին` ժամը 14.20-ի սահմաններում, մեր տեսախցիկն արձանագրեց, թե ինչպես էին Գյումրու ավտոկայանում Երևան մեկնող ուղևորները անձրևի տակ սպասում միկրոավտոբուսների: Նրանցից մեկը մոտենալով մեզ, խնդրեց բառացիորեն տեղ հասցնել իր խոսքը. «Քանի ժամ է՝ կանգնած եմ, հարցնում եմ ինչու «գազել» չկա՝ նորմալ պատասխանող չկա, դե արի ու մի ասա ընտրություններն էլ մեռնին, ընտրություն հորինողն էլ` վրեն: Էս ի՞նչ վիճակ է, հիվանդիդ անգամ չես կարող հասնել, անպայման պիտի ժամերով սպասե՞ս, 3 հազար դրամ էլ տաս տաքսուն, որ քեզ տեղ հասցնի: Ի՞նչ հնարավորություններից ելնելով տամ, խիղճները կորցրած տաքսու շոֆերներն էլ 2500 դրամը դարձրեցին 3000»:
Մենք փորձեցինք ճշտել, թե ինչո՞ւ միկրոավտոբուսները չեն աշխատում, մի՞թե դա իրոք կապված է ընտրությունների հետ: Դիսպետչերներից մեկը վստահեցրեց, որ մի քանի րոպեից վիճակը կնորմալանա:
Հիշեցնենք, որ Գյումրի-Երևան երթուղին սպասարկող ընկերություններից մեկը` «Տրանս ակնթարթը», պատկանում է ԲՀԿ Շիրակի մարզային կառույցի պատասխանատու, ԱԺ պատգամավոր Մարտուն Գրիգորյանի ընտանիքին: Երիտասարդ պատգամավորն այս անգամ ևս առաջադրել է իր թեկնածությունը:
Դիսպետչերի հետ զրույցից մի քանի րոպե անց ժամանեց միկրոավտոբուսը, ու մարդիկ տրանսպորտ բարձրանալու համար սկսեցին միմյանց հրմշտել, վիրավորել: Վայրկյաններ անց հայտնվեց երկրորդ միկրոավտոբուսը ու նույն պատմությունը սկսվեց այստեղ:
Մեզ այդպես էլ չհաջողվեց միկրոավտոբուսների աշխատանքների խափանման իրական պատճառը իմանալ: Ի դեպ, ժամը 12.00-ի սահմաններում էլ մեր ֆոտոխցիկն արձանագրեց Գյումրու քաղաքապետարանի մոտ շարված միկրոավտոբուսները, մեզ ահազանգել էին, որ դրանց միջից Հանրապետականը փող է բաժանում: Մենք նման փաստի ականատես չեղանք:
Նշենք, որ Գյումրիում ընտրությունները մեկնարկել են մարդկանց դռները թակելով. գյումրեցիներից շատերի վկայությամբ, ընտրակաշառք բաժանող կուսակցությունները առավոտ շուտ հիշեցրել են, որ մարդկանց ձայնը գնված է և պարտադրել են գնալ ընտրատեղամաս:
Նունե ԱՐԵՎՇԱՏՅԱՆ
