Վերջին տարիներին բանկային գաղտնիք պարունակող տեղեկությունների ստացման որոշումների քանակը շեշտակի ավելացել է՝ դրանով պայմանավորված խնդրո առարկա տեղեկատվության մշակման եւ պատրաստման, ինչպես նաեւ իրավապահ մարմիններին փոխանցման վրա ծախսվող ժամանակը եւ ռեսուրսները նույնպես ավելացել են, ինչը դժվարացրել է թե՛ իրավապահ համակարգի, թե՛ ֆինանսական կազմակերպությունների աշխատանքը: Այս մասին ԱԺ պետական-իրավական հարցերի մշտական հանձնաժողովի հերթական նիստում ասել է Արդարադատության նախարարի տեղակալ Գեւորգ Քոչարյանը՝ առաջին ընթերցմամբ ներկայացնելով «Հայաստանի Հանրապետության քրեական դատավարության օրենսգրքում» եւ կից օրենքներում լրացումներ եւ փոփոխություններ կատարելու մասին օրենսդրական փաթեթը:
Նախագծերի փաթեթով առաջարկվում է բանկային եւ հարակից գաղտնիք պարունակող տեղեկությունների առգրավման դեպքում օրենքով նախատեսել դրանց առգրավման նաեւ էլեկտրոնային եղանակը:
Հիշյալ գործընթացն էլեկտրոնային եղանակով տրամադրելը, ըստ փոխնախարարի, միտված է տեղեկատվության փոխանցման վրա ծախսվող ժամանակի ու ռեսուրսների կրճատմանը, ինչպես նաեւ գաղտնիք կազմող տեղեկատվության փոխանցման գործընթացում մարդկային ներգրավվածության նվազեցմանը:
Գերատեսչությունը նախատեսել է, որ գործընթացն իրականացնելու նպատակով կներդրվի հատուկ պաշտպանված էլեկտրոնային կապուղի, որի միջոցով էլ ֆինանսական կազմակերպություններից գաղտնիք կազմող տվյալները կփոխանցվեն իրավապահ մարմիններին:
Կարդացեք նաև
Հարակից զեկույցով հանդես է եկել «Քաղաքացիական պայմանագիր» խմբակցության պատգամավոր Լիլիթ Մինասյանը: Պատգամավորը հորդորել է ներդնել ճիշտ կիբեռանվտանգության համակարգ ու կոչ արել հանձնաժողովի անդամներին կողմ քվեարկել:
Հանձնաժողովը դրական եզրակացություն է տվել օրենսդրական փաթեթին:
ԱԺ
