«Բարեւ ձեզ, էս ի՞նչ է պատահել, ինչի՞ եք այսքան շատ հավաքվել»,- տեսնելով ՀՀԿ գրասենյակի մոտ հավաքված լրագրողներին, ասաց նախագահ Սերժ Սարգսյանը: Նրա տրամադրությունը բավականին բարձր էր: «Ի՞նչ է պատահել, լավ էլ գրում եք, լավ էլ մեկնաբանում եք, լավ է»,- հավելեց նախագահը եւ բարեւելով իրեն դիմավորող միակ մարդուն՝ վարչապետ Տիգրան Սարգսյանին, մտավ ներս:
Նախագահից հետո ՀՀԿ գրասենյակ եկան նաեւ Գալուստ Սահակյանը եւ Կարեն Ավագյանը: Գալուստ Սահակյանը բավականին մտահոգ տեսք ուներ:
Իսկ մինչ այդ վարչապետ Սարգսյանը, որը կառավարության շենքից ոտքով էր եկել ՀՀԿ գրասենյակ, լրագրողներին ասաց, որ զինվեն համբերությամբ, եւ առայժմ ոչինչ ավելացնել չի կարող:
Ոչ ոք չէր տեսել, թե ինչպես էՀՀԿ գրասենյակ եկել Հովիկ Աբրահամյանը, սակայն ասում էին, որ նա արդեն վաղուց այնտեղ է:
Կարդացեք նաև
Շրջանառվող խոսակցությւնների համաձայն՝ ՀՀԿ համամասնական ցուցակից 46 անդամների ինքնաբացարկի դիմումները վաղը ներկայացվելու են ԿԸՀ: Ասվում է, որ ինքնաբացարկ հայտնողների թվում են նաեւ Էդուարդ Շարմազանովը եւ Գագիկ Բեգլարյանը: Ենթադրվում է, որ նրանք գործադիրում պաշտոններ կզբաղեցնեն: Առայժմ որեւէ մեկը ոչ հերքում, ոչ էլ հաստատում է այս խոսակցությունները:
Նելլի ԳՐԻԳՈՐՅԱՆ
