Կապանի տարածաշրջանում երեկ գիշերվանից շարունակ տեղացող հորդառատ անձրեւների պատճառով սարալանջերից հոսող ջրերի, տիղմի, հողի ու քարի մեծ զանգվածների հետեւանքով միակողմանի փակվել է Երեւան-Մեղրի մայրուղու 311-րդ կիլոմետրի Կապան-Քաջարան ճանապարհի 50մ հատվածը` դժվարություններ առաջացնելով վարորդների համար:
Վաղ առավոտից, Կապանի ճանշին ձեռնարկության աշխատակիցների ջանքերով բացվել են նույն ճանապարհի մյուս հատվածները, սակայն մինչեւ այժմ նրանց չի հաջողվում երկկողմանի երթեւեկությունը վերականգնել տվյալ ճանապարհահատվածում:
Կապան-Քաջարան ճանապարհին կառուցվել է ջրապաշտպան պատնեշ` փորձելով կարգավորել չդադարող, եւ մեծ ծավալներով անընդհատ սարերից մայրուղի թափվող հեղեղի հոսքը: Ճանապարհի տվյալ հատվածում հերթապահություն է սահմանված:
Կապանի ճանշին ձեռնարկության գլխավոր ճարտարագետ Սերգեյ Առուստամյանի խոսքով, այս պահին էլ ճանապարհաշինարարների կողմից դեռ շարունակվում են մայրուղու երկկողմանի երթեւեկության վերականգնմանն ուղղված աշխատանքներ տարվել:
Մերի ՍՈՂՈՄՈՆՅԱՆ
