Արդյոք 5-րդ գումարման խորհրդարանն իր որակով նախորդներից ավելի լա՞վն է, նույն որակն ունի՞, թե՞ ավելի վատն է դարձել: Հիշեցնենք, որ դեռեւս անցած տարի իշխանությունները, մասնավորապես` ՀՀ նախագահ Սերժ Սարգսյանն ու վարչապետ Տիգրան Սարգսյանն, այս` արդեն ձեւավորված խորհրդարանի համար գոնե մեկ որակական տարբերություն խոստանում էին: Նրանք բազմիցս հայտարարել են, թե պետական կառավարման համակարգը պետք է տարանջատվի գործարարությունից: Նրանք խոստանում էին, թե իրենց պատգամավորական ցուցակներում գործարարներ չեն լինի: Բայց արդյո՞ք դա այդպես է, նրանք կատարեցի՞ն իրենց խոստումը: Իհարկե` ոչ: Իշխանությունները պարզապես մի անհաջող խորամանկ քայլ մտածեցին` համամասնական ցուցակներում գործարարներ չընդգրկվեցին: Կամ գրեթե չընդգրկվեցին: Բայց զուգահեռաբար հայտարարեցին, թե յուրաքանչյուր ոք իրավունք ունի մեծամասնական ընտրակարգով առաջադրվել: Երբ կոալիցիոն կուսակցությունները հրապարակեցին իրենց մեծամասնական թեկնածուների անունները, պարզվեց, որ նրանց մեջ գործարար, ընդամենը մի քանի հոգի: Ավելին, կոալիցիոն կուսակցությունների, հատկապես` ՀՀԿ-ի համամասնական ցուցակի պատգամավորների մի մասը նույնպես գործարարներ են:
Եվ այսպես, մամուլում բազմաթիվ հրապարակումներ են եղել, թե ինչ բիզնեսներ ունի ԱԺ նախկին նախագահ Հովիկ Աբրահամյանը: Նա համարվում է մեր երկրի ամենախոշոր գործարարներից մեկը: Հայտնի է, որ ՀՀԿ համամասնական ցուցակից բիզնեսներ ունեն կուսակցության փոխնախագահ Գալուստ Սահակյանը, պատգամավորներ Հերմինե Նաղդալյանը, Վարդան Այվազյանը, Կարեն Ճշմարիտյանը, Մանվել Գրիգորյանը, Նահապետ Գեւորգյանը, Մարտին Սարգսյանը, Սպարտակ Մելիքյանը, Արտակ Դավթյանը, Արմեն Մխիթարյանը, Առաքել Մովսիսյանը, Արա Բաբլոյանը եւ այլք: Վերջինս, մի քանի հիվանդանոցների հետ միասին, ունի նաեւ ապահովագրական ընկերություն: Իսկ մեծամասնական ընտրակարգով ընտրված ՀՀԿ-ի պատգամավորների արդեն գերակշիռ մասը գործարարներ են: Այս բլոկում են նաեւ ՀՀԿ-ի ու Հայաստանի հայտնի գործարարները: Հակառակ Ս.Սարգսյանի ու իրենց հայտարարությունների` նորից խորհրդարան վերադարձան Սամվել Ալեքսանյանը, Ռուբեն Հայրապետյանը, ինչպես նաեւ` Կարեն Կարապետյանը, «ՄԱՊ» գինու-կոնյակի գործարանի սեփականատեր Ալեքսան Պետրոսյանը, «Կիլիկիա» գարեջրի գործարանի սեփականատեր Հակոբ Հակոբյանը, «Հրազդան» տոնավաճառի սեփականատեր Աշոտ Աղաբաբյանը, «Ջերմուկ Գրուպի» սեփականատեր Աշոտ Արսենյանը, «Եվրոստան Ույուտ» ընկերության սեփականատեր Մանվել Բադեյանը, «Դերժավա» ընկերության սեփականատեր Արկադի Համբարձումյանը, Վոլոդյա Բադալյանը եւ այլք: Իսկ նոր պատգամավորներից հայտնի գործարարներ են Արտակ Սարգսյանը (ՍԱՍ-ի Արտակ), Գարեգին Նուշիկյանը, Վրեժ Մարկոսյանը: Բիզնեսներ ունեն նաեւ նախկին թաղապետ, այժմ պատգամավոր Մհեր Սեդրակյանը, Արթուր Գրիգորյանը, Ռուբեն Հովսեփյանը: Արդյունքում` մեծամասնական ընտրակարգով ընտրված ՀՀԿ-ի 29 պատգամավորներից առնվազն 24-ը բիզնեսներ ունեն: Հնարավոր է, որ բիզնեսներ չունեն Սամվել Ֆարմանյանը, Սյունիքից ընտրված Հայկ Գրիգորյանը, Արտաշատից` Կարինե Պողոսյանը, Տավուշից` «Գրանդ հոլդինգի» սեփականատեր Վարդանյանների թեկնածու Մարինե Մարաբյանը եւ Քանաքեռ-Զեյթուն համայնքից ընտրված Արթուր Ստեփանյանը: Իսկ ՀՀԿ համամասնական ցուցակից բիզնեսներ ունեն առնվազն 20 պատգամավորներ: Այսինքն` ՀՀԿ-ի 69 պատգամավորներից 45-ը կամ մոտ 70 տոկոսը գործարար են: Ճիշտ է, նրանց մեծ մասը վերջին տարիներին իրենց բիզնեսները գրանցել են հարազատների անունով:
Արմինե ԱՎԵՏՅԱՆ
«168 ժամ»
