ԵԽԽՎ Բյուրոյի ժամանակավոր հանձնախմբի վերջին զեկույցում կոշտ գնահատականներ կային՝ ԱԺ ընտրությունների վերաբերյալ: Հիշեցնենք, որ այդ զեկույցը կազմվել էր ԵԽԽՎ պատգամավոր, բարոնուհի Էմմա Նիքոլսոնի գլխավորած դիտորդական առաքելության կողմից՝ մայիսի 6-ին անցկացված դիտարկման հիման վրա: Միջազգային դիտորդների այս գնահատականների հետ համաձայն չեն Հանրապետականները: ՀՀԿ պատգամավոր Արտակ Զաքարյանը Aravot.am-ի հետ զրույցում զեկույցն այսպես մեկնաբանեց. «Այս ընտրությունները շահեկանորեն տարբերվել են նախորդ բոլոր խորհրդարանական ընտրություններից եւ ես կարծում եմ, որ որեւէ զեկույց, որեւէ փաստաթուղթ կամ որեւէ կարծիք, այդ թվում նաեւ՝ անհատական, չի կարող ստվերել մի ամբողջ ժողովրդի կողմից իրականացված պարզ, թափանցիկ, հրապարակային միջոցառում»: Մենք ճշտեցինք՝ օբյեկտիվ չէ՞ին այդ գնահատականները՝ պարոն Զաքարյանը պատասխանեց. «Ես կարծում եմ, որ կան որոշակի սուբյեկտիվ տարրեր»:
Հռիփսիմե ՋԵԲԵՋՅԱՆ
