«Այս այն հարցն է, որտեղ ես ձեռնպահ կմնամ պատասխանել»,- Aravot.am-ի հարցին` նախագահ Սարգսյանի եւ ԱՄՆ պետքարտուղար տիկին Հիլարի Քլինթոնի հանդիպման մասին պաշտոնական ծանուցումն ընթերցելով ի՞նչ տպավորություն ստացաք, ի՞նչ հարցեր են քննարկել ԱՄՆ պետքարտուղարն ու ՀՀ նախագահը, պայմանավորվածություններ ձեռք բերվե՞լ են, ասաց ՀՀԿ գործադիր մարմնի անդամ, ԱԺ պետաիրավական հարցերի մշտական հանձնաժողովի նախագահ Դավիթ Հարությունյանը: Նա նաեւ հրաժարվեց ենթադրություններ անել այդ հարթությունում:
Aravot.am-ի դիտարկմանն էլ` այնպիսի տպավորություն էր, որ տիկին Քլինթոնը իրեն նեղություն էր տվել Հայաստան այցելելու, որպեսզի Սերժ Սարգսյանի հետ փոխանակվի մեր եղանակային պայմանների վերաբերյալ կարծիքներով եւ ասեի, թե որքան շատ է սիրում մեր նախագահին, Դավիթ Հարությունյանը հակադարձեց. «Ենթադրում եմ, որ դա նշանակում է, որ որոշ հարցեր, որոշ մանրամասներ են քննարկվել, որոնք չեն բարձրաձայնվում»:
Ընդդիմադիր Հայ ազգային կոնգրեսից արդեն իսկ տեսակետեր հնչեցին, որ շռայլված ժպիտների եւ գովասանքների դիմաց պետք է սպասել, որ ԱՄՆ-ը Հայաստանի իշխանություններից լուրջ ակնկալիքներ ունի, որոնք չի բացառվում, որ վերաբերվեն նաեւ ազատագրված տարածքները վերադարձնելուն: Դավիթ Հարությունյանն ի հեճուկս այս կարծիքի կողմնակիցների հայտարարեց. «Չեմ ենթադրում, որ որեւէ մեկը կարող է մեզ պարտադրել` անել մի քայլ, որը վնաս է մեր ազգային շահերին»:
Նելլի ԳՐԻԳՈՐՅԱՆ
Կարդացեք նաև
