«Կրասնոդարում ապրում է մոտ մեկ միլիոն հայ: Տասնյակ տարիներ առաջ տեղի հայերը չգիտեին համայնքն ինչ բան է: Այն ստեղծվել է Սովետական Միության փլուզումից հետո: Դա ամենամեծ հայ համայնքն է Ռուսաստանում: Բաղկացած է 45 շրջաններից»,- այսօր «Հայացք» ակումբում կազմակերպված ասուլիսի ժամանակ ասաց Կրասնոդարի երկրամասի հայ համայնքի նախագահ Ռազմիկ Գևորգյանը:
Բանախոսը վերջին տարիներում նկատում է արտահոսք Հայաստանից: Մեկնող անձանցից ոչ բոլորն են իրենց գործի մասնագետները, ուստի համայնքի աշխատանքը ավելի է ծանրանում: Եթե ժամանակին համայնքի խնդիրն էր՝ օգնել Հայաստանին, ապա այսօր` հայապահպանությունն է. «Պետք է պահվի մեր լեզուն, եկեղեցին, մշակույթը: Ստանում ենք հայ գրականություն, մեր մոտի ուսուցիչներին ուղարկում ենք այստեղ վերապատրաստման, չնայած, որ նրանց կարիքը դեռ ունենք: Բացի դա, Հայաստանից եկող ընտանիքները 2-3 տարի հետո սկսում են ռուսերեն խոսել: Կրոնի պահպանման հարցում էլ է շատ քայլեր արվում. Կրասնոդարում այսօր կառուցվում է 12 եկեղեցի: Ամենքն էլ ունի երկու քահանա: Հայապահպանության խնդիր է նաեւ խառը ամուսնությունը: Մեր հայ աղջիկները ավելի լավն են, բայց դա երիտասարդները չեն հասկանում»:
Ապրելով Ռուսաստանում, Կրասնոդարի համայնքապետը իշխանության մեջ կցանկանար տեսնել նաեւ հայերին: Ասում է` դա որոշ չափով ստացվում է իրենց մոտ:
Ներքին խնդիրներ համայնքում չեն լինոււմ` հավաստիացնում է բանախոսն ու ավելացնում, եթե լինում էլ է, ապա դա միտումնավոր բնույթ է կրում:
Հայերը Կրասնոդարում խնդիր չեն ունենա Ռուսաստանի օրենքներին հետեւելու դեպքում, իսկ աշխատանք կարող են գտնել, եթե լավ մասնագետ են:
Արամ ԱՐԱՐԱՏՅԱՆ
