Aravot.am-ը «Ժառանգություն» խմբակցության ղեկավար Ռուբեն Հակոբյանի հետ զրույցում հետաքրքրվեց՝ արդյոք խմբակցության անդամներին չի° կաշկանդում այն հանգամանքը, որ տարածված կարծիք կա, թե «Ժառանգության» խմբակցությունն այլևս այն ուժեղ թիմը չէ, ինչ նախկին գումարման խորհրդարանում: Պարոն Հակոբյանը պատասխանեց. «Չի կաշկանդում, քանի որ առաջիկայում ամեն ինչ պարզ կլինի: Իսկ մենք, իրոք, ունեինք ամուր խմբակցություն, որն ակտիվ աշխատում էր և ԱԺ-ում, և հասարակության հետ: Հիմա ունենք այն, ինչ ունենք, բայց կարելի է գնահատական տալ խմբակցության գործունեությանը, իհարկե համեմատության մեջ, երբ այն սկսի աշխատանքը , երբ ԱԺ-ն սկսի աշխատանքը»:
Հետաքրքրվեցինք՝ իրենց վստահ զգու°մ էին կառավարության ծրագրի վերջին քննարկումներին: Պատգամավորը պատասխանեց. «Ինչ-ինչ, բայց վստահության պակաս չկա խմբակցության մոտ»:
Խորհրդարանում՝ ՀԱԿ-ի ներկայությունը Ռ. Հակոբյանը դրական գնահատեց և նկատեց. «Ինչո°ւ են դիտարկում, թե ՀԱԿ-ի ներկայությունը խոչընդոտ է «Ժառանգության» համար: ՀԱԿ-ի ներկայությունը խորհրդարանն ակտիվացրեց, այլ հարց է, որ խմբակցությունների համագործակցության համար ինձ թվում է արհեստական խոչընդոտներ կան: ՀԱԿ-ի և մեր խմբակցության մոտեցումների տարբերությունն այն է, որ ՀԱԿ-ն ասում է, թե ով է մեղավոր, մենք ասում ենք, որ մեղավոր ենք բոլորս»:
Ռուբեն Հակոբյանը խոսեց ընդդիմության և իշխանության սխալներից և նշեց, որ սխալվելը բոլորիս բնական իրավունքն է: Այս առիթով հարցրինք՝ արդարացնու°մ է Գագիկ Բեգլարյանի վերադարձը: Ռ. Հակոբյանը պատասխանեց. «Անձերի հետ կապված հարցերն ինձ համար երկրորդական բաներ են: Գագիկ Բեգլարյանը կլինի, թե Պողոս Պողոսյանը՝ էական չէ: Մենք դեմ ենք ոչ թե կառավարությանը, այլ այն արժեհամակարգին, որ այսօր կա: Վստահ եմ, որ կառավարության անդամներն ավելի հայրենասեր են, քան մնացած բոլորս, բայց նրանք հայտնվում են մի համակարգում, որ նման հայրենասիրության վերջին հանգրվանը դառնում է երեսպաշտությունը»:
Կարդացեք նաև
Տաթև ՀԱՐՈՒԹՅՈՒՆՅԱՆ
