Երգիչ, երգահան Լիլիթ Պիպոյանը խոսելով «Հարսնաքար» ռեստորանային համալիրի հայտնի դեպքի ու ողբերգական հետեւանքների մասին, ասում է, որ ամեն ինչ գալիս է հասարակության մեջ օրենքի նկատմամբ հարգանքի պակասից: Իսկ վերջինիս պատճառն էլ, ըստ երգչուհու, այն է, որ օրենքը չի գործում այնպես, ինչպես որ ուզում ենք, ու հարցերը լուծելու միակ «ճշմարիտ» ճանապարհը «սամասուդն» է դարձել:
«Մարդիկ կոնկրետ տեղում , որը իրենց համար ֆեոդալական կալվածքի պես է, լուծում են իրենց հարցերը՝ չդիմելով իրավապահներին, փաստորեն իրենց տարածքում գործում են իրենց ներքին օրենքները եւ ոչ թե ընդհանուր օրենքներ: Ոչ թե մարդուն ձերբակալում են, հրավիրում պատշաճ վարքի, այլ սամասուդ են անցկացնում եւ մարդը մեռնում է: Ինչո՞ւ է տեղի ունենում սամասուդ, դրա մասին պետք է մտածել»,-կարծում է Լիլիթ Պիպոյանը: Ու դիմում է իշխող կուսակցությանը՝ ՀՀԿ-ին. «Մեզ խոստանում էիք՝ հավատացեք, որ փոխենք: Ինչի՞ն հավատանք եւ ինչը փոխենք…Եթե գիտեք, որ պիտի փոխվի ինչ-որ բան, դե այս իրավիճակում կամք ցուցաբերեք եւ իսկապես փոխեք»:
Լիլիթ Պիպոյանի խոսքով, ՀՀԿ-ն պետք է ապացուցի, որ ուզում է պատժել մեղավորներին, քանի որ դա իշխանության պարտքն է: Մտավորականներն էլ, երգահանի ձեւակերպմամբ, չպետք է լռիկ-մնջիկ ու վախվորած նստեն կամ կրավորական կեցվածք ցուցաբերեն, նման երեւույթների դեմ պարտավոր են պայքարել բոլորը, իսկ «Հարսնաքարն» էլ պիտի բոյկոտվի:
«Մի օբյեկտում, որտեղ սպանություն է կատարվել, զվարճանալը նողկալի է, մարդիկ պիտի գիտակցեն, ու չգնան, պիտի հասկանան, որ մի օր էլ իրենց հետ կարող է նման բան պատահել»,-ասում է Պիպոյանը:
Կարդացեք նաև
Գոհար ՀԱԿՈԲՅԱՆ
