Միջազգային ուղևորափոխադրումների վերաբերյալ ՀՀ ազգային վիճակագրական ծառայության տվյալները վկայում են, որ 2012թ. հունվար-հունիսին միջազգային ուղևորահոսքերի բացասական մնացորդը (հանրապետությունից մեկնածների և ժամանածների թվերի տարբերությունը) նախորդ տարվա նույն ժամանակահատվածի համեմատ ավելացել է 6,6 հազարով կամ 9,8%-ով և կազմել -73,9 հազար: Առաջին կիսամյակում Հայաստան ժամանածների ընդհանուր թիվը եղել է 822149, մեկնածներինը` 896023:
Հունվար-հունիս ամիսներին օդային տրանսպորտով երկրի սահմանը հատած ուղևորների տեսակարար կշիռը ուղևորափոխադրումների ընդհանուր ծավալում կազմել է 45,4%: Ավիատրանսպորտով ժամանածների ընդհանուր թիվը եղել է 361240, մեկնածներինը` 418051, սալդոն` -56811:
ՀՀ ՏԿՆ միգրացիոն պետական ծառայության տվյալների վերլուծությունը ցույց է տալիս, որ վերջին տասնամյակում օրինաչափությունը պահպանվում է, և 2012թ. հունիսին ևս միջազգային ուղևորահոսքերի ընդհանուր մնացորդը եղել է դրական: Այն կազմել է 4,3 հազար մարդ` նախորդ տարվա հունիսի 2 հազարի դիմաց:
Ժամանել է 185674, մեկնել` 181334 մարդ: Ընդ որում` ավիատրանսպորտով ժամանածների թիվը կազմել է 89318, մեկնածներինը` 76667, դրական սալդոն` 12651:
Ի տարբերություն օդային տրանսպորտով ուղևորափոխադրումների` հունիսին երկաթուղով և ավտոտրանսպորտով երկրի սահմանը հատածների սալդոն բացասական է: Մասնավորապես, երկաթուղային տրանսպորտով ժամանել է 1557, մեկնել` 2160 մարդ: Սալդոն` -603: Ավտոտրանսպորտով ժամանել է 94799, մեկնել` 102507 մարդ: Սալդոն` -7708:
«Փաստինֆո» լրատվական գործակալություն
