Ներկայումս ամենաքննարկվող և ամենահրատապ խնդիրներից են դարձել Սիրիայում տեղի ունեցող իրադարձությունները: Մասնավորապես, իրավիճակը սրված է Հալեպում, որտեղ գոյություն ունի բավականին մեծ հայ համայնք: Ուստի Aravot.am-ը արաբագետ Սուրեն Մանուկյանի հետ զրույցում հետաքրքրվեց՝ նրա գնահատմամբ՝ արդյոք ՀՀ իշխանությունները բավարար աջակցություն ցուցաբերո՞ւմ են և պատրա՞ստ են ցուցաբերել սիրիահայերին: Նա պատասխանեց. «Իրավիճակն այնքան բարդ է, որ ամենահեշտ բանն է մեղադրել իշխանություններին: Տեղյակ եմ, որ մեր իշխանությունները հետևում են կատարվող իրադարձություններին և պատրաստ են արձագանքել զարգացումներին: Այն, որ մինչև այժմ Դամասկոսում աշխատում է ՀՀ հյուպատոսությունը, արդեն մեծ բան է հայ համայնքի համար»:
Անդրադառնալով բարոյական օգնության խնդրին՝ արաբագետը նկատեց. «Սիրիայում ապրող հայերը շատ ավելի շատ կուզենային ստանալ բարոյական աջակցություն և ամենօրյա ուշադրություն հայկական պետության կողմից, քանի որ իրենք ասում են, որ ի տարբերություն շատ այլ ազգային փոքրամասնությունների՝ իրենք ունեն հայրենիք: Կարծում եմ, որ ՀՀ կառավարությունը պետք է ակտիվացնի երկկողմ հարաբերությունները: Իհարկե, պատերազմական իրավիճակում շատ հարցեր քննարկել հնարավոր չէ: Պարզապես Հայաստանից պատվիրակության մեկնելն այնտեղ սիրիահայերի մոտ կստեղծի այն զգացումը, որ հայկական պետությունը մոտ է իրենց և իրազեկ իրենց խնդիրներին: Այս հարցում հայկական իշխանություններն անելիք ունեն»:
Մեր այն դիտարկմանը, թե արդեն խոսվում է ՀՀ-ում անշարժ գույքի շուկայում գների բարձրացման մասին սիրիահայերի՝ Հայաստան հոսքով պայմանավորված, պարոն Մանուկյանն այսպես արձագանքեց .«Իրականում անշարժ գույքի շուկան մասնավոր շուկա է, որին կառավարել չի լինի: Կարծում եմ, որ այդպես էլ պետք է լիներ, ինչպես եղավ Իրանում սրացումներից հետո: Դա ուղղակի տնտեսական բնական երևույթ է: Իսկ ՀՀ կառավարությունը, եթե սիրիահայերի կեցության հարց պիտի լուծի, դա պիտի լինի նրանց ժամանակավոր բնակվելու իրավունք տալու ձևով, մինչև նրանք հասկանան, թե որն է իրենց ճակատագիրը»:
Տաթև ՀԱՐՈՒԹՅՈՒՆՅԱՆ
