Oդային հարվածի արդյունքում ոչնչացվել է 20 զինյալ
Եգիպտոսի անվտանգության ծառայությունների պաշտոնյաները հայտնել են Սինայան թերակղզում գործող զինյալների ուղղությամբ իրականացված հարձակման մասին:
Պաշտոնյաների համաձայն, չորեքշաբթի օրն իրականացված օդային հարվածի արդյունքում ոչնչացվել է 20 զինյալ:
Օդային հարվածն իրականացվել է Իսրայելի և Գազայի գոտու հետ սահմանից 50 կիլոմետր հեռավորության վրա գտնվող Էլ-Արիշ քաղաքի հսկիչ-անցագրային կետերից մեկի ուղղությամբ զինյալների կողմից իրականացված գրոհից ժամեր անց:
Կարդացեք նաև
Եգիպտոսի զինված ուժերը և նախագահ Մոհամեդ Մորսին խոստացել են վերահսկողություն հաստատել Իսրայելի և Գազայի գոտու հետ Եգիպտոսի սահմանի հատվածում:
Հիշեցնենք, որ երկու հափշտակված մեքենաների միջոցով կիրակի օրը Իսրայելի սահմանը հատելու փորձ կատարած զինյալների գործողությունների պատճառով զոհվել է 16 սահմանապահ:
Իսրայելի պաշտպանության նախարար Էհուդ Բարաքը երկուշաբթի օրը հայտնել է Իսրայելի խորհրդարանական հանձնաժողովին զինված ուժերի կողմից ութ զինյալ ոչնչացնելու մասին: Նրա համաձայն, գրոհը կասեցնելու գործում շատ օգտակար են եղել հետախուզության կողմից տրամադրված տեղեկությունները:
Ի պատասխան այս հարձակմանը, Եգիպտոսի իշխանությունները փակել են Գազայի գոտու հետ սահմանային «Ռաֆահ» անցակետը: Եգիպտոսի նախագահ Մոհամեդ Մորսին «նենգություն» է անվանել այս հարձակումը:
Եգիպտոսի նախկին նախագահ Հոսնի Մուբարաքի անցյալ տարի ներկայացրած հրաժարականից հետո Սինայան թերակղզին գնալով վատթարացել է անվտանգության իրավիճակը: Թերակղզում գործող զինյալների հարձակումների են ենթարկվել Եգիպտոսի անվտանգության ուժերը, զինյալները պայթյունների են իրականացրել դեպի Իսրայել և Հորդանան բնական գազ տեղափոխող խողովակաշարերում, անդրսահմանային հարձակումների ընթացքում սպանել Իսրայելի քաղաքացիներին:
Արմեն Հովհաննիսյան
«Ամերիկայի Ձայն»
