Իրանի Թավրիզ քաղաքի մոտակայքում այսօր ժամը 18: 02 րոպեին տեղի ունեցած երկրաշարժը զգացվել է նաեւ Սյունիքում: Էպիկենտրոնում երկրաշարժի ուժգնությունը կազմել է 7 բալ: Իսկ Սյունիքում գրանցված հետցնցման ուժգնությունը, ըստ «Սեյսմիկ պաշտպանության հարավային ծառայություն» ՊՈԱԿ-ի տվյալների, կազմել է 4 բալ: Ցնցումը զգացվել է Սյունիքի մարզի Ագարակ, Մեղրի, Կապան, Քաջարան, Գորիս, Սիսիան քաղաքներում:
Կապանում ժամը 18:05-ի սահմաններում բնակիչները ուժեղ ցնցում են զգացել ու կրկին դուրս եկել տներից:
«Ապակիներն են ուժեղ շարժվել, մոտ 3-5 վայրկյանում հատակը ցնցվեց ոտքերիս տակ, էդտեղից հասկացա, որ կրկին երկրաշարժ ա եղել: Թոռնիկս քնած էր, արագ գրկեցի ու 6-րդ հարկից իսկույն իջա բակ»,- ասում է Կապանի բնակչուհի Անահիտը, ով մտադիր է կրկին ապահով տեղ գտնել գիշերը լուսացնելու համար: Խուճապային ու անհանգիստ տրամադրությունը մարզկենտրոնում հազիվ էր սկսում հանդարտվել, բայց նոր հետցնցումից շատերի մոտ կրկին նոր անհանգստություն է առաջացել: Պատասխանատուներն, այնուամենայնիվ, հավաստիացնում են, որ զգոնությունը պետք չէ կորցնել, բայց խուճապի մատնվելու կարիք էլ չկա:
Մերի ՍՈՂՈՄՈՆՅԱՆ
Կարդացեք նաև
