Սան Պաոլոյում մեկնարկած շախմատի «Մեծ սաղավարտ վարպետներ» եզրափակիչ մրցաշարի երկրորդ տուրում Հայաստանի լավագույն շախմատիստ Լեւոն Արոնյանը սեւերով ոչ-ոքի է արել աշխարհի նախկին չեմպիոն, հնդիկ գրոսմայստեր Վիշվանաթան Անանդի հետ, ռուսաստանցի Սերգեյ Կարյակինը երկրորդ անընդմեջ պարտությունն է կրել, այս անգամ՝ Ֆաբիանո Կարուանայից (Իտալիա), իսկ ՖԻԴԵ-ի վարկանիշային աղյուսակի առաջատար նորվեգացի Մագնուս Կարլսենը հաղթել է Իսպանիայի լավագույն շախմատիստ Ֆրանսիսկո Վալյեխոյին:
Երկրորդ տուրից հետո մրցաշարային աղյուսակը վեց միավորով գլխավորում է Կարուանան: Նրան հաջորդում են Արոնյանը՝ 4,0, Կարլսենը՝ 3,0, Անանդը՝ 2,0, Վալյեխոն՝ 1,0, Կարյակինը՝ 0:
Այսօր՝ երրորդ տուրում, հանդիպում են Արոնյան-Վալյեխո, Կարուանա-Անանդ եւ Կարլսեն-Կարյակին զույգերը:
Աշոտ ՀԱԿՈԲՅԱՆ
