Այսօր ԵԽԽՎ-ում «Սոցիալական արդարության վերականգնումը ֆինանսական գործարքների հարկի միջոցով» զեկույցի քննարկման ժամանակ ելույթով հանդես եկավ հայկական պատվիրակության անդամ Հերմինե Նաղդալյանը: Իր ելույթի սկզբում նա նշեց. «Ֆինանսական ճգնաժամը կլանեց Եվրոպան, ինչը բազում դժվարություններ ծնեց ողջ տարածաշրջանի համար: Որոշ դեպքերում նկատելի եղան քաղաքական, ինչպես նաև տնտեսական հետևանքներ: Վեհաժողովը կրում է ընտրողների առաջ պատասխանատվություն, իսկ պետական պաշտոնյաները պետք է ներդնեն մեխանիզմներ տնտեսական ճգնաժամի հետևանքների վերացման և հաղթահարման համար: Վեհաժողովը փորձեր կատարեց դասեր քաղել տնտեսական ճգնաժամից»:
Հ. Նաղդալյանը վկայակոչեց սոցիալական, առողջապահության և ընտանեկան հարաբերությունների հանձնաժողովի անդամների պատրաստած զեկույցները: Տիկին Նաղդալյանը նկատեց, որ քննարկման առարկա զեկույցը մեկն է այն զեկույցներից, որոնց միջոցով Վեհաժողովը դասեր է քաղում տնտեսական ճգնաժամից: Հայ պատվիրակը նշեց. «Բանաձևի ընդունման նպատակն է ոչ միայն ֆինանսական գործարքների հարկի հաստատումը, այլև սոցիալական արդարության հաստատումը»:
Շարունակելով` տիկին Նաղդալյանը նշեց, որ պետությունները փորձում էին պայքարել տնտեսական ճգնաժամի դեմ ՝ օգտագործելով հարկատուների ներդրումները: Բայց դա, ըստ Հ. Նաղդալյանի՝ արդար չէր, քանի որ հարկային եկամուտները օգտագործվել են բանկերին ստեղծված իրավիճակից դուրս բերելու համար, ոչ թե մարդասիրական նպատակներով:
Տիկին Նաղդալյանը նաև նկատեց. «Ողջ տնտեսական համակարգը վճարեց ճգնաժամի համար, իսկ ինստիտուտները, որ պետք է կրեին դրա պատասխանատվությունը, ոչ միայն վնասներ չկրեցին, այլև շահույթ ստացան: Կենսական նշանակության հարց էր գործողությունների դիմելը: Եվրահանձնաժողովն ու Եվրախորհրդարանը առաջարկներ են ներկայացրել արգելել մեծ ռիսկեր պարունակող ֆինանսական գործարքները: Սա կարող էր ունենալ դոմինոյի էֆեկտ»: Տիկին Նաղդալյանը Վեհաժողովին տեղեկացրեց, որ տասը երկրներ արդեն համաձայնել են այդ համակարգի առաջամարտիկը դառնալ և արդեն ունեն ֆինանսական գործարքների հարկի սխեմա: Առաջ անցնելով հայ պատվիրակը շեշտեց. «Նրանք, ովքեր տնտեսությունը ռիսկի են ենթարկում, պարտավոր են վճարել դրա համար»:
Կարդացեք նաև
Զեկույցով հետաքրքրվել էին ավելի քան 30 մասնակիցներ, այդ պատճառով էլ տիկին Նաղդալյանն ասաց, թե հետո էլ ասում են, որ ուրբաթ օրն առավոտյան քչերն են գալիս բանավեճի, այնինչ հարցի կարևորությունը գրավել է շատերին: Դառնալով եվրոպական տնտեսությանը՝ տիկին Նաղդալյանը նշեց, որ Եվրոպան իր տնտեսական կարողությունն ամբողջությամբ չի պահպանել, և հիմնականում արտադրանքը ներմուծում է Չինաստանից: Ըստ նրա՝ զեկույցում ներկայացվող մեխանիզմները հնարավորություն կտան նեցուկ լինել իրական տնտեսության վերհանմանը: Տիկին Նաղդալյանը կարծիք հայտնեց, որ դրա համար պարզապես պետք է մեկը կոշտ դիրքորոշում ունենա և առաջին քայլն անի:
Տիկին Նաղդալյանը նաև նկատեց. «Սովորական քաղաքացիների դրամապանակին կպչելն ընդունվում է որպես սովորական երևույթ, այնինչ ստացվում է, որ ֆինանսական ինստիտուտներին դիպչելն անթույլատրելի է»:
Հատկանշական է, որ բանաձևի վերաբերյալ պատվիրակների մեծամասնությունն իր համաձայնությոնը հայտնեց և այն քննարկման դրվեց առանց որևէ լրացման կամ լրամշակման:
Տաթև ՀԱՐՈՒԹՅՈՒՆՅԱՆ
