Երևան քաղաքի Բաշինջաղյան 1-ին նրբանցք, 15 շենք, բնակարան 16 հասցեի բնակիչ Կարինե Ավետյանին եւ նրա երեք աղջկան, որոնցից երկուսն անչափահաս են, ժամեր առաջ ՀՀ ԱՆ Դատական ակտերի հարկադիր կատարման ծառայության (ԴԱՀԿ) ներկայացուցիչները դատարանի որոշման հիման դուրս հանեցին վերոհիշյալ հասցեում գտնվող բնակարանից:
Կարինե Ավետյանի համոզմամբ՝ բնակարանի վաճառքն իրականացվել է իր նախկին ամուսնու կեղծ անձնագրով: Եվ սա այն դեպքում, երբ Ավետյանի ասելով, ինքը հանդիսանում է բնակարանի սեփականատեր:
ԴՀԱԿ-ի առաջարկով Կարինե Ավետյանը հայտարարություն գրեց այն մասին, որ իր հետ վերցվում է բնակարանի գույքը:
Կարդացեք նաև
ԴՀԱԿ-ի աշխատակիցների միջամտությամբ գույքն աստիճանաբար դուրս բերվեց բնակարանից, սակայն մայրը չգիտի՝ որտեղ տեղավորել այն եւ երեխաներին:
Հուսահատության գիրկն ընկած աղջիկները, ովքեր սովորում են գերազանց առաջադիմությամբ, բղավում էին, որ իրենց հանդեպ անարդար են վարվել: Երեխաներից մեկն անգամ փորձ արեց դեղահաբեր խմել՝ կյանքին վերջ տալու նպատակով. շտապ օգնության ծառայության աշխատակիցները համապատասխան օգնություն ցուցաբերեցին:
Հավելենք, որ Կ. Ավետյանը տարիներ շարունակ խնդրով դիմել է տարբեր պատկան մարմիններին, սակայն ապարդյուն: Ինչ վերաբերում է տիկնոջ նախկին ամուսնուն, վերջինս այս պահին հետախուզման մեջ է:
Լուիզա ՍՈՒՔԻԱՍՅԱՆ
