«Որեւէ մեկը եթե կարծում է, որ պետք է վախենամ քաղաքական բահից, նա սխալվում է: Ես լավագույնն եմ մաղթում «Ազատ դեմոկրատներ» կուսակցությանը, վիրավորված չեմ, կարծում եմ, որ դա իրենց որոշումն է, որեւէ մեկի սատարումն էլ չեմ հայցում : «Ժառանգությունը» միշտ ունեցել է ֆինանսական խնդիրներ լուծելու մարտահրավեր, որովհետեւ մենք բիզնեսմեն չունենք: Ես որեւէ այլ շահութաբեր գործունեություն չեմ ծավալում Հայաստանում, ազատ ու անկախ եմ, իմ ընտանիքը եւ ես որեւէ կապ չունենք` բոլորս ենք մտնելու օրենքի դաշտ: Մենք ներառում ենք, թե կուսակցական գործիչների, թե մտավորականների, որեւէ փոփոխություն չկա` ազատ եւ արդար ընտրություններ»,-այսօր «Փաստարկ» ակումբում լրագրողների հետ հանդիպման ժամանակ ասաց «Ժառանգություն» կուսակցության նախագահ Րաֆֆի Հովհաննիսյանը:
Նրա խոսքով, եղել են տարբեր տեսակի քաղաքական եւ բարոյական պարտավորություններ, որոնք չեն կատարվել.
«Խիստ անհավասար մրցակցություն եմ ակնկալում, բայց հաղթահարելի: Մեզ համար էական չի եղել իմ անձի ներկայությունը Ազգային ժողովում, կարծում եմ հավաքական աշխատանքի վրա հիմնված մենամարտ կլինի: 21-րդ տարեդարձը ոլորած ճակատագրական փուլում է երկիրը, եթե այս ընթացքում զորաշարժի չենթարկենք, ապա դժվար կլինի»:
«Ժառանգություն» կուսակցությունը կգումարի իր համագումարը դեկտեմբերի 15-ին, եւ կորոշի թե ինչ է անելու ընտրությունների ժամանակ:
Կարդացեք նաև
«Հաղթանակի դեպքում մենք կժառանգենք այլ որակի Հայաստան: Դա մենակ չեմ անելու` քաղաքացիական հասարակությունը, սրտացավ մտավորականները, ովքեր երկիրը փոխելու մտադրություն ունեն, նրանք ինձ կօգնեն: 2013 թ.-ը ես իմ վրա պետք է վերցնեմ: Քաղաքացիական հասարակությունը եւ ուժերը պետք է միեւնույն ուժի աղբյուր դառնան: Ես ակնկալում եմ, որ կլինի հաղթանակ»,-պնդում է Րաֆֆի Հովհաննիսյանը:
Կուսակցության նախագահի համոզմամբ՝ որպես նախագահ թագավոր պետք չէ , այլ պետք է շարքային քաղաքացի, ով երկրի օրենքը կկրի առանց շահույթի եւ մասնավոր բիզնեսների:
«Այսօր գնում ենք դեպի փակուղի, սակայն այն հաղթահարելի է, ժողովուրդը կարող է փոխել իր սեփական ընթացքը, քաղաքացին պետք է ասի` Հայաստանն իմն է: Խոսքը գործի վերածելու խնդիր կա: Մրցակիցներին պետք է լրջորեն վերաբերվել, բոլորը պետք է դատվեն ու գնահատվեն նույն չափանիշներով: Պետք է ունենանք նոր նախագահ, իմ հիմնական մրցակցությունը կգնա գործող նախագահի հետ, եթե վերջինս դնի իր թեկնածությունը»:
Անժելա ՇԱՀՈՒՄՅԱՆ
