ՀՀ նախկին նախագահ Ռոբերտ Քոչարյանն իր վերջին հայտարարության մեջ նշել էր, որ «Հայաստանում մեծամասնական ընտրակարգը նպաստում է տարածքների ֆեոդալականացման գործընթացին` ընտրատարածքների սահմաններում, ընդ որում իշխանությունը կամա թե ակամա աջակցում է դրան, քանի որ միտված է վերարտադրման»:
Այսօր լրագրողների հետ ճեպազրույցում այս առնչությամբ Aravot.am-ի հարցին ՀՀԿ խոսնակ Էդուարդ Շարմազանովը պատասխանեց. «Անկախ երկրորդ նախագահի, առաջին նախագահի, անկախ տարբեր երկրների նախագահների, փորձագետների կարծիքից, մեր կարծիքը չի փոխվում: Մեր այո-ն այո է, ոչ-ը՝ ոչ»: Լրագրողները հետաքքրվեցին՝ ձեր խոսքն է՞լ է գործ, ինչը պարոն Շարմազանովը հումորով ընկալեց:
Նրա խոսքերով՝ «Մեծամասնական ընտրակարգի հետ կապված ՀՀԿ-ն իր կարծիքը հստակ արտահայտել է Ընտրական օրենսգրքի քննարկումների ժամանակ, երբ ԲՀԿ-ի, ՕԵԿ-ի հետ համատեղ եղանք ԸՕ-ի համահեղինակները: Համամասնականի հետ կապված իրականացրել ենք լսումներ, ՀՀԿ-ն իր կարծիքը հայտնել է, այն այսօր չի փոխվել: Մենք այն քաղաքական ուժը չենք, որ 6 ամիս առաջ իրականացնենք փոփոխություններ, 6 ամիս հետո ասենք, վայ, գիտեք, մենք ուրիշ կարծիք ունենք: Մենք ասում ենք, որ կարեւորը ձեւը չի, կարեւորը բովանդակությունն է: ՀՀԿ-ն, ի տարբերություն որոշ քաղաքական ուժերի, երբեք ձեւական, կոսմետիկ փոփոխությունների հետեւից չի գնացել, եւ երբեք առաջնությունը չի տվել ձեւին: Առաջնությունը տվել է բովանդակությանը: Անկախ նրանից՝ երկրորդ նախագահը, առաջին նախագահը ինչպիսի կարծիք կունենան՝ մեր կարծիքը որեւէ մեկի կարծիքից կախված չի: Կարելի է լինել պառլամենտական եւ Հունգարիայի նման կեղտոտ գործարքի գնալ, եւ կարելի է լինել նախագահական եւ ԱՄՆ-ի նման ժողովրդավարական երկիր լինել: Բողոքում են մեծամասնականից նրանք, ովքեր հնարավորություն չունեն ընտրվելու»:
Կարդացեք նաև
Հռիփսիմե ՋԵԲԵՋՅԱՆ
