Aravot.am-ի հետ զրույցում ԱԺ Պաշտպանության, ազգային անվտանգության եւ ներքին գործերի մշտական հանձնաժողովի նախագահ, ՀՀԿ պատգամավոր Կորյուն Նահապետյանը, հակադարձելով առաջին նախագահ Լեւոն Տեր-Պետրոսյանի նշած պատրվակին, որ 68 տարեկան է, դրա համար չի առաջադրվում՝ ասաց, որ տարիքը խոհեմություն է: Տարիքի բարձր կամ ցածր լինելը խիստ հարաբերական է. «Մենք Սահմանադրությամբ որոշել ենք ներքին շեմ՝ 35 տարին, իսկ դա նշանակում է, որ 35 տարեկանից բարձր յուրաքանչյուր անձ կարող է ե’ւ հավակնել, ե’ւ ընտրվել՝ որպես ՀՀ նախագահ: Իսկ առավելագույն տարիքի առումով տարբեր երկրների փորձը ցույց է տալիս, որ դա չի կարող լինել խոչընդոտ՝ պաշտոնավարելու որպես նախագահ»:
Կորյուն Նահապետյանը համաձայն չէ նաեւ առաջին նախագահի այն դիտարկմանը, թե 68 տարեկան մարդը չի կարող ունենալ այն նույն ակտիվությունը, ինչ 40-60 տարեկանը. «Անձը կարող է 40-60 տարեկան լինել, բայց ունենալ պակաս աշխատունակություն, քան 68 տարեկանում: Դա սուբյեկտիվ է եւ կապված է տվյալ անձի ցանկություններից, կարողությունից, մոտեցումներից, թե ինչպես է ինքը գնահատում իր կարողությունները: Եթե մարդը առողջական խնդիրներ ունի, ապա ինքը կարող է այդ խնդիրն ունենալ ինչպես 40 տարեկանում, այնպես էլ 68: Բնական է, որ բարձր տարիքում ավելի շատանում են խնդիրները, բայց կարծում եմ, որ առավել բարձր տարիքում նաեւ քաղաքական կենսափորձը կարող էր նպաստավոր լինել՝ երկիրը ղեկավարելու համար»:
Հռիփսիմե ՋԵԲԵՋՅԱՆ
