Նախագահի թեկնածու Պավլիկ Սարգսյանը ընտրություններին մասնակցելու համար նույնիսկ խորհրդանշական մեկ դրամը անօրինական է համարում:
«Այ, եթե մտնենք խաղատուն, քանի որ խաղատան կանոնակարգը Սահմանադրությամբ սահմանված չէ, նրանք իրավունք ունեն սեփական կանոնակարգն ունենալ: Բայց ես չեմ մտել խաղի մեջ, մտել եմ իմ քաղաքացիական իրավունքին հետամուտ լինելու»,- ասում է ընտրական 8 միլիոն դրամ գրավի պարտադիր պահանջը բողոքարկող նախագահի թեկնածուն:
Մեր հարցին, ընտրություններում հաղթելու շանս ունե՞ք, պարոն Սարգսյանն ասաց. «Ընդհանրապես կախվողի տանը պարանից չեն խոսում: Այսինքն՝ անօրեն երկրում օրենքից չեն խոսում: Իրավազուրկ քաղաքացիներ ենք: Ես ընդամենը քվե եմ ուզում: Մինչդեռ հանրային հեռուստաընկերությունը ծաղրի է ենթարկում հանրապետության ընտրվող քաղաքացիների 95 տոկոսին՝ ֆիլմի հատվածներ ցուցադրելով՝ դենգի դավայ, դենգի դավայ»:
Նա չունի 8 միլիոն դրամ գրավը ու մտադրություն էլ չունի հավաքելու, որովհետեւ ընտրություններին մասնակցելու իր առաքելությունն ուրիշ է. «Սովորական քաղաքացու, վաստակավոր գործազուրկի իրավունքն եմ ուզում պաշտպանել: Ես 1993-ից աղետի գոտում աշխատում էի շինարարական կազմակերպությունում, որտեղ դադարեցվեց ֆինանսավորումը եւ երկու տարվա աշխատավարձ չստանալով՝ ես ըմբռնումով դուրս եկա. դա էր հայրենիքիս վիճակը»:
Կարդացեք նաև
Նա նաեւ պատրաստվում է դիմել Սահմանադրական դատարան՝ 8 միլիոն դրամ գրավի պահանջը հակասահմանադրական համարելու պահանջով:
Արփինե ՍԻՄՈՆՅԱՆ
