Շոու-բիզնեսի որոշ ներկայացուցիչների մասին Facebook-յան թարմ «գուշակությունների» թվում էր Ալ. Սպենդիարյանի անվան օպերայի եւ բալետի ազգային ակադեմիական թատրոնի պրիմա պարուհի Ժակլին Սարխոշյանի անձնական կյանքը: Բուռն քննարկման նյութ էր դարձել պարուհու լուսանկարը՝ հարսի զգեստով: Այս առիթով «Առավոտի» հետաքրքրությանն ի պատասխան՝ պարուհին հայտնեց, որ երեւանյան հարսանյաց սրահներից մեկի առաջարկը՝ մասնակցել ֆոտոսեսիայի, սիրով է ընդունել: «Ամուսնությանս օրը ես կրել եմ ճերմակ կոստյում, սակայն գաղտնիք չէ, որ յուրաքանչյուր կնոջ երազանքն է այդ օրը ներկայանալ հենց հարսի զգեստով»,- նշեց մեր Ժակլինը: Ճի՞շտ է, որ վաղաժամ այրիացած պարուհին իսկապես այս տարի նպատակ ունի ապագա կողակցի հետ եկեղեցի մտնել ճերմակ զգեստով: Այս լուրը պարուհին ոչ հաստատեց եւ ոչ էլ հերքեց՝ ընդամենն ասելով. «Մարդը ծրագրում է, Աստված՝ տնօրինում»:
ՍԱՄՎԵԼ ԴԱՆԻԵԼՅԱՆ
«Առավոտ» օրաթերթ
