Քիչ առաջ Aravot.am-ին էին դիմել Գյումրու նորընտիր քաղաքապետ Սամվել Բալասանյանի կողմից աշխատանքից հեռացված մի քանի հոգի` տեղեկացնելով, որ իրենք մոտակա օրերին գնալու են Շիրակի մարզի ՀՀԿ կառույցի ղեկավար Սահակ Մինասյանի մոտ ու ցուցադրաբար հրաժարվելու են կուսակցության անդամատոսերից: Այս պահին նրանք խնդրեցին չհրապարակել իրենց անուն-ազգանունները` խոստանալով այդ արարողությանը հրավիրել նաև Aravot.am-ին:
Այժմ արդեն գործազուրկ դարձած աշխատակիցներն իրենց այս մտադրությունը պարզաբանեցին հետևյալ կերպ. «Սամվել Բալասանյանը, որը ոչ թե ընտրվեց, այլ նշանակվեց Սերժ Սարգսյանի կողմից, նրան երախտապարտ լինելու փոխարեն, չհարգեց հենց նույն ՀՀԿ-ականներին: Հիմա մենք կհրաժարվենք ՀՀԿ անդամ լինելուց, որովհետև տեսանք, որ իշխող կուսակցությունը անզոր է պաշտպանել իր անդամներին, փաստացի ԲՀԿ-ն ավելի զորեղ է, որ կարողանում է ՀՀԿ-ականներին ազատել տալ առանց լուրջ հիմնավորումների»:
Նշենք, որ խոսքը տվյալ պահին վերաբերում է Վարդան Ղուկասյանի օրոք աշխատած ու ՀՀԿ-ական դարձած կադրերին, որոնց, սակայն , քաղաքապետ Սամվել Բալասանյանը ազատեց աշխատանքից տարբեր պատճառաբանություններով:
Այս թեմայի շուրջ ՀՀԿ կառույցի ղեկավար Սահակ Մինասյանի պարզաբանումները կհրապարակենք քիչ անց:
Կարդացեք նաև
Նունե ԱՐԵՎՇԱՏՅԱՆ
