Թբիլիսիի մերձակա Լիլո ավանի բնակիչ, 1951թ. ծնված Բադրի Բերձենաշվիլին 2002թ. դեկտեմբերի 25-ին Նոյեմբերյան-Ալավերդի ճանապարհահատվածում «Ֆիատ» մակնիշի ավտոբուսով բախվել է «ԳԱԶ-3221» մակնիշի ավտոմեքենային, որի հետեւանքով այդ մեքենայի վարորդ , Երեւանի բնակիչ Գեւորգ Ջալալբեկյանը ստացել է միջին ծանրության մարմնական վնասվածք, «ԳԱԶ-3221» ավտոմեքենային պատճառվել է 816 հազար դրամի նյութական վնաս: Բադրի Բերձենաշվիլուն մեղադրանք է առաջադրվել ՀՀ քրեական օրենսգրքի 242 հոդվածի 1-ին մասով: Սույն քրեական գործը Տավուշի մարզի ընդհանուր իրավասության առաջին ատյանի դատարանի Իջեւանի նստավայր մուտք է եղել 2003 թ. նոյեմբերի 4-ին, ընդունվել է վարույթ եւ նշանակվել դատաքննություն:
Ամբաստանյալ Բադրի Ակսենտեւի Բերձենաշվիլին երկու անգամ չի ներկայացել նշանակված դատական նիստերին, որի պատճառով 2003 թ. դեկտեմբերի 12-ին որոշում է կայացվել քրեական գործը կասեցնելու, հետախուզում հայտարարելու եւ խափանման միջոցը փոխելու վերաբերյալ: Ներկայումս վերացել են քրեական գործի վարույթը կասեցելու հանգամանքները, 2013թ. փետրվարի 6-ին Տավուշի մարզի առաջին ատյանի դատարանի Բերդի նստավայրում դատական նիստ է նշանակված: Ամբաստանյալի նկատմամբ խափանման միջոց է ընտրված չբացակայելու մասին ստորագրությունը:
Ոսկան ՍԱՐԳՍՅԱՆ
