Aravot.am-ը մասնակցեց քվեների հաշվմանը՝ Ս. Սպանդարյանի անվան 24 դպրոցում տեղակայված 9/11 տեղամասում:
Հանձնաժողովի ԲՀԿ-ական նախագահ Ջուլիետա Ավագյանը տեղեկացրեց, որ 7:35 դրությամբ 1245 ընտրողներից մասնակցել էր 625 ընտրող. «Դրանից հետո չեմ ֆիքսել, թղթերով էի զբաղված»: Չնայած ընտրատեղամասի ժամացույցով 19: 56 էր, սակայն վստահված անձանցից ոմանք ասացին, որ ժամացույցը հետ է: Հանձնաժողովի ՀՀԿ-ական քարտուղար Կարինե Նալբանդյանն ու նախագահն ասացին, որ այդ ժամացույցով են աշխատել ընտրությունների սկզբից, դրանով էլ պետք է առաջնորդվեն:
ՀՅԴ ներկայացուցիչ Հմայակ Կարապետյանը պատասխանելով մեր հարցին, ասաց, որ ամեն ինչ նորմալ է անցել, չհաշված թեթեւ միջադեպը՝ հանձնաժողովի անդամների եւ վստահված անձանց միջեւ հակասությունների հետ կապված:
ՀԱԿ-ի ներկայացուցիչ Հասմիկ Հովսեփյանն, ընդհակառակը, դժգոհ էր ընտրությունների ընթացքից. «Ժողովրդի մեջ ակտիվությունը մարել է, բերում են այնպիսի մարդկանց, որ թվում է թե շունչներն ուր որ է էստեղ կփչեն, որովհետեւ 89-90 տարեկան կինը հաստատ իր կամքով չի գալիս ընտրության, բերում են»: Մեր հարցին՝ ո՞ր ուժին նկատի ունի, տիկին Հասմիկը պատասխանեց՝ պարզ է որ ՀՀԿ-ն:
Կարդացեք նաև
Նրա խոսքով, համատիրության նախագահը՝ Սուրիկ Ներսիսյանը ամբողջ ընթացքում ընտրատեղամասում է եղել եւ բոլորին ուղղորդել է. «Ինքը մեծ քարոզչություն կատարեց: Եթե ինքը չլիներ, ՀՀԿ-ն երեւի շատ ձայներ չէր ունենա»:
Ի դեպ, երբ հանվում էին ՀԱԿ-ի կամ «Բարեւ Երեւան» դաշինքի քվեաթերթիկները, այդ ուժերը ներկայացնողները ծափահարում էին:
Հավելենք, որ ընտրությունների ավարտից րոպեներ պակաս ձեռնափայտով մի տիկին ներս մտնելուն պես «մուննաթ» եկավ հանձնաժողովի անդամների վրա. «Բերեիք տուն էլի»: Երբ հետաքրքրվեցինք, մի՞թե քվեաթերթիկը իր տուն են տարել երբեւէ, պատասխանեց. «Դե առաջ հիվանդներին տուն էին բերում ստորագրելու»: Տիկինը ավելին չուզեց ասել, քանի որ հասկացել էր, որ լրագրողի հետ է խոսում:
Ի դեպ, մինչ ներսում քվեներն էին հաշվում, դռներից այն կողմ մի խումբ «կերած-խմած» տղամարդիկ էին հավաքված, որոնք ավելի ուշ, հավանաբար հանձնաժողովականների ակնարկով հեռացան:
Գոհար ՀԱԿՈԲՅԱՆ
