Հայաստանի նախագահի 2013թ. ընտրությանը հետևող ԵԱՀԿ/ԺՄԻԳ դիտորդական առաքելությունը հրապարակել է հետընտրական վերջնական զեկույցը:
Լրատվամիջոցների մասով զեկույցում ասվում է, որ Հայաստանում հեռուստատեսությունը տեղեկատվության ամենակարևոր աղբյուրն է, հատկապես Երևանից դուրս: «Հ1» Հանրային հեռուստատեսությունը, որը հեռարձակվում է ամբողջ երկրով, համարվում է ամենաազդեցիկ լրատվամիջոցը: Մինչդեռ տպագիր մամուլի ազդեցությունը փոքրանում է: Արագորեն աճում է ընթերցողների քանակը առցանց լրատվամիջոցներում, որոնց մեջ կան քաղաքականապես կողմնորոշվածներ: ԵԱՀԿ/ԺՀՄԻԳ դիտորդները ողջունել են նախընտրական շրջանում լրատվամիջոցների ավելի ազատ միջավայրը և տեղեկատվության բազմազանությունը, հատկապես ինտերնետում: Ամեն դեպքում, նրանք մատնանշում են դեռևս առկա այնպիսի խնդիրներ, ինչպիսիք են օրինակ, ինքնագրաքննությունը և լրատվամիջոցների սեփականման որոշակի դեպքեր, որոնք բացասաբար են ազդում բազմակարծության և խմբագրական ազատության վրա:
ԵԱՀԿ/ԺՀՄԻԳ դիտորդական առաքելությունը ուսումնասիրել է 6 հեռուստաընկերության, 2 ռադիոկայանի, 2 առցանց լրատվամիջոցի և 3 թերթի ընտրություններին առնչվող նյութերը:
Զեկույցում ասվում է, որ լրատվամիջոցները զգալի ուշադրություն էին դարձնում քաղաքականությանը և ընտրություններին առնչվող լուրերին:
Ուսումնասիրված լրատվամիջոցների մեծ մասը (բացի «Արմ նյուզ»-ից, «Երկիր Մեդիա»-ից և «Ազատություն»-ից) դիտողներին առաջարկել է պաշտոնական լուրերի լուսաբանում` կենտրոնանալով քարոզչական միջոցառումների, այլ ոչ թե քաղաքական ծրագրերի վրա, ու այդպիսով քարոզարշավների հետ կապված վերլուծական լուսաբանում չէին տրամադրում: Դրան հակառակ, տպագիր և առցանց մամուլը առաջարկում էր քննադատական մեկնաբանություններ և վերլուծություններ:
Սերժ Սարգսյանին ամենաշատը լուսաբանել են երկու ամենահայտնի մասնավոր հեռուստաալիքներով` «Արմենիա»-ով և «Շանթ»-ով, 32% և 30% համապատասխանաբար, գրեթե ամբողջը դրական կամ չեզոք լուսաբանում է եղել: Րաֆֆի Հովհաննիսյանին ամենաշատը լուսաբանել են «Հ2»-ով և «Կենտրոն»-ով, 29% և 26% համապատասխանաբար:
Ասվում է, որ «Հ1»-ի «Տեսանկյուն» վերլուծական հաղորդումը կողմնակալություն էր ցուցաբերում որոշ ընդդիմադիր կուսակցությունների և որոշ թեկնածուների դեմ:
Առցանց լրատվամիջոցները, այդ թվում ավանդական թերթերի կայքերը, առաջարկում էին տեսակետների լայն բազմազանություն:
Պետության կողմից ֆինանսավորվող «Հայաստանի Հանրապետություն» թերթը նախապատվությունը տալիս էր Սերժ Սարգսյանին` թեկնածուների համար հատկացված տարածքի 21%-ը տրամադրելով նրան, մինչդեռ «Հայկական Ժամանակ»-ը հստակ կողմնակալություն էր անում Սերժ Սարգսյանի դեմ` 39% խիստ քննադատական վերլուծություններով: «Առավոտ» թերթի քարոզարշավի լուսաբանումը հավասարակշռված էր:
Պատրաստեց Հովհաննես ԻՇԽԱՆՅԱՆԸ
