Լոռու մարզի ընդհանուր իրավասության դատարանը, դատավոր Նարինե Հովակիմյանի նախագահությամբ, երեք տարվա ազատազրկման է դատապարտել իր նորածին երեխային սպանած վանաձորցի Ն. Ժ-ին:
Դատարանը, սակայն, որոշում է կայացրել նշանակված պատիժը պայմանականորեն չկիրառել՝ հաշվի առնելով այն հանգամանքը, որ կնոջ խնամքին են երեք անչափահաս երեխաները, ընտանիքը գտնվում է ծանր սոցիալական վիճակում:
Համաձայն դատավճռի՝ ամբաստանյալի նկատմամբ ազատազրկման ձեւով նշանակված պատիժը կարող է առավել ծանր նյութական կացության մեջ դնել նրա երեք անչափահաս երեխաներին:
Ն. Ժ.-ի նկատմամբ սահմանվել է փորձաշրջան 3 տարի ժամկետով` նրա վարքի վերահսկողությունը հանձնելով ՀՀ ԱՆ ՔԿՎ այլընտրանքային պատիժների կատարման բաժնին:
Կարդացեք նաև
46-ամյա վանաձորցի կինը մեղադրվում էր իր նորածին երեխային սպանելու մեջ: Համաձայն մեղադրական եզրակացության` Ն.Ժ.-ն 2012 թվականի դեկտեմբերի 11-ին, ժամը 3-ի սահմաններում Վանաձոր քաղաքի իր տան խոհանոցում ծննդաբերել է իր համար անցանկալի իգական սեռի կենդանի, կենսունակ, հասուն երեխա, ապա հիշյալ փաստն իր հարազատներից թաքցնելու եւ նորածնին ապօրինաբար դիտավորությամբ կյանքից զրկելու նպատակով նա իր ձեռքի տակ ունեցած վերնազգեստով փակել է նորածնի շնչառական ուղիները, շնչահեղձ արել, սպանել Է նրան եւ դիակը թաքցրել խոհանոցի բազմոցի հետնամասում, որից հետո հարազատների կանչով ժամանած շտապ օգնության աշխատակիցներին հայտնել է որ իր մոտ տեղի Է ունեցել հղիության ընդհատում, նրանց կողմից տեղափոխվել է Վանաձորի ծննդատուն։
Անուշ ԲՈՒԼՂԱԴԱՐՅԱՆ
