Նոյեմբերյան քաղաքում կայացած «Մարդու իրավունքներից դեպի բացարձակ ժողովրդավարություն» խորագրով ժողովրդավարության ամառային ֆորումի ժամանակ օգոստոսի 13-ին կայացավ խորհրդանշական դատ:
Հայցվորները՝ «Լուսածիր» ՀԿ հիմնադիր անդամ Ալիսա Ամիրաղյանը, «Նոյաստղ» եւ «Հակինթ» ՀԿ-ների նախագահներ Էմմա Ալեքսանյանը եւ Հայկավարդ Աբովյանը հանդես եկան ընդդեմ «Փարոս» համակարգի:
Պատասխանող կողմը ներկայացնում էին սոցիալական ծառայության Նոյեմբերյանի տարածքային գործակալության պետ Սամվել Բեգլարյանը եւ Ջուջեւան համայնքի ղեկավար Ժորա Չիլինգարյանը:
Հայցվորները նշեցին, որ ընտանեկան նպաստների համակարգն անկատար է, դրանում առկա են կոռուպցիոն ռիսկեր, երբեմն նյութապես ապահովվածներն են իրական աղքատների փոխարեն ընտանեկան նպաստ ստանում:
Կարդացեք նաև
Սամվել Բեգլարյանն ասաց, որ հայցը չի ընդունում, այն կարող էր ուղղված լիներ միայն գործող օրենքի դեմ, իսկ իրենց ծառայության աշխատակիցները, որպես քաղաքացիական ծառայողներ, կատարում են օրենքով իրենց վերապահված գործառույթները:
Ս. Բեգլարյանը ընդունեց, որ սոցիալական ծառայությունը ֆինանսական հնարավորություն, ավտոտրանսպորտ չունի պոտենցիալ նպաստառուների բնակավայրեր մեկնելու, տեղում նրանց նյութական իրական վիճակը ճշտելու համար:
Մինչեւ վճռի կայացումը փորձագիտական եզրակացությամբ հանդես եկավ Նոյեմբերյանի համայնքների միության գործադիր տնօրեն Անդրանիկ Վերանյանը:
Դատալսման մասնակիցների բաց քվեարկությամբ հայցը բավարարվեց ձայների 14 կողմ, 1 դեմ եւ 5 ձեռնպահ հարաբերակցությամբ:
Ոսկան ՍԱՐԳՍՅԱՆ
