«Պիտակի վրա անգլերեն մակնշման տարբերակում թան բառը չէինք նշել, քանի որ ոչ մի կերպ չգտանք դրա համարժեք բառը եւ գրեցինք առանց թան բառի ու ստացվել էր 100 տոկոս պաստերիզացված կաթ: Անգլիացին էլ գնել էր ու թանը կաթի տեղ եռացրել»,-Aravot.am-ի հետ զրույցում այսպես պարզաբանեցին տնտեսական մրցակցության պաշտպանության պետական հանձնաժողովի` (ՏՄՊՊՀ) «Բոնիլատ»-ին տուգանելու որոշման վերաբերյալ:
Այսօր ՏՄՊՊՀ-ն սպառողին մոլորեցնելու համար ի թիվս այլ ընկերությունների տուգանել է նաեւ կաթնամթերք արտադրող «Բոնիլատ» ընկերությանը, որն ըստ հանձնաժողովի, կաթի փոխարեն թան է վաճառել:
Մինչդեռ ինչպես ընկերությունից են վստահեցնում, հայերեն մակնշման մեջ հստակ գրված է եղել, որ թան է. «Մենք գրությամբ բացատրել ենք հանձնաժողովին եւ մինչեւ խախտումը հայտնաբերելն արդեն պիտակը փոխել էին եւ նոր տարբերակում արդեն այդ խախտումը չկա»:
Aravot.am-ի հարցին, գտե՞լ եք թան բառի անգլերեն համարժեքը, «Բոնիլատ»-ից պատասխանեցին, որ չեն գտել, պարզապես անգլերեն տառերով գրել են` tan:
Կարդացեք նաև
Այս ընկերության տուգանքը կազմել է 600 հազար դրամ, այսինքն` ինչպես ՏՄՊՊՀ օրենքն է սահմանում`ընկերության հասույթի 1 տոկոսը:
Կաթնամթերք արտադրող այս ընկերության պատասխանատուները նշեցին, որ հանձնաժողովի տուգանքը «ահագին» վնաս կհասցնի իրենց տնտեսությանը, հատկապես, որ գործարանը գտնվում է Թալինում եւ իրենք տեղափոխման համար էլ են մեծ ծախսեր անում:
Լուսինե ԲՈՒԴԱՂՅԱՆ
