ՀՀ Ոստիկանապետ
Վ. Գասպարյանին
Պարոն Ոստիկանապետ,
Ցավալի է, որ Գորիս քաղաքում ս/թ հունվարի 22-ի գիշերը տեղի ունեցած ծանր հանցագործության փաստի կապակցությամբ ոստիկանության մարմինները իրենց անգործության համար մեղադրում են Զանգվածային լրատվության միջոցներին:
Կարդացեք նաև
Միանշանակ է, որ դեպքը ոստիկանությունում գրանցվել է ուշացումով, այն էլ ԶԼՄ-ների կողմից բարձրացված «աղմուկից» հետո (ի՞նչ նշանակություն ունի մեկ օր, թե երկու օր ուշացումով):
Դրա փոխարեն ճիշտ կլիներ, որ Սյունիքի մարզային ոստիկանությունը իր կառույցներով հանդերձ հանրությանը տեղյակ պահեր, որ հանցագործություն կատարած Լիսկայի եղբոր մարդասպան որդի Մայիս Խաչատրյանը նա է.
- Ով 2004թ.-ի փետրվարի 29-ին Գորիս քաղաքում դաժանորեն սպանեց անչափահաս երեխաների հայր Հովհաննես Բադալյանին և դատապարտվելով 12 տարի ազատազրկման, պատիժ կրեց ընդամենը 7 տարի, արժանանալով ՀՀ նախագահի ներմանը,
- Ով 2010թ.-ի դեկտեմբերի 5-ին թմրադեղերի ազդեցության տակ վթարի ենթարկեց Երևան քաղաքի բնակիչ Տարոն Գալստյանին՝ նրան պատճառելով կյանքին սպառնացող առողջության ծանր վնաս (Տ. Գալստյանը այսօր հաշմանդամի կարգավիճակով գամված է անկողնում)
Ոստիկանությունը՝ ի դեմս Սյունիքի մարզային կառույցի, պետք է հաշվետվություն տա, թե ինչու՞ անցած 8 ամիսներին «մատը մատին» չկպցրեց՝ ընթացք տալու Լիսկայի կողմից կատարված բազմաթիվ հանցագործությունների վերաբերյալ ԶԼՄ-ների հրապարակումներին (հատկապես իր, կնոջ և որդիների կողմից հանցավոր ճանապարհներով կեղծված ատեստատներ,դիպլոմներ ձեռք բերելու փաստերը մեծագույն հարված, վիրավորանք և անպատվություն է՝ ուղղված մեր պետությանը,նրա կրթության և գիտության բնագավառին):
Հունվարի 22-ի գիշերը տեղի ունեցած դեպքի կապակցությամբ ոստիկանությունը դեռևս քրեական գործ չի հարուցել, դեռևս չի հայտնաբերվել գլխավոր «հերոս» Մայիս Խաչատրյանը (երևի որոշակի ժամանակ է անհրաժեշտ թմրադեղերի ազդեցությունից դուրս գալու համար): Նույնիսկ խոսակցություններ են շրջանառվում, որ իրավապահները ցանկանում են հերթական անգամ «փրկել» Լիսկային և գործը «կոտրել» տուժող Վ. Մեսրոպյանի վրա, ինչպես անամոթաբար դա արեցին Բուդաղյանների դեպքում:
Հարգելի ոստիկանապետ.
Հասարակության համար Ձեր կողմից «ձեռնարկվող միջոցառումները» դրական առումով տեսանելի չեն:
Խնդրում ենք սթափվեք և կատարեք կոլեգիայում հնչեցրած Ձեր խոստումները…
Հարգանքներով՝
Արման Սահակյան
