Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանի դատավոր Լեւոն Ավետիսյանի նախագահությամբ սկսվեց «Արաբկիր» բժշկական կենտրոնի բոքսային բաժանմունքի մանկաբույժներ Լիլիթ Վարդանյանի եւ Զարինե Այվազյանի դեմ հարուցված քրեական գործի դատաքննությունը: 1985թ. ծնված մանկաբույժների ոչ պատշաճ բժշկական գործողությունների, անփութության, անգործության պատճառով կյանքից զրկվել է 2-ամյա Լիա Միսակյանը:
Զարինե Այվազյանի պաշտպանությունն իրականացնում էր ՀՀ փաստաբանների պալատի անդամ Երեմ Սարգսյանը, Լիլիթ Վարդանյանինը՝ Գիվի Հովհաննիսյանը:
Մեղադրանքը պաշտպանում էր Արաբկիր համայնքի դատախազի տեղակալ պարոն Կարապետյանը: Տուժողի իրավահաջորդ Գեւորգ Միսակյանի շահերի ներկայացուցիչն էր իրավապաշտպան Արթուր Սաքունցը: Վերջինիս մասնակցության հետ կապված դատավորը հայտնեց, որ գործից բացակայում է տուժողի իրավահաջորդի ներկայացուցիչ ճանաչելու մասին որոշումը, հետագայում պարզվեց, որ լիազորագիր էլ չուներ իրավապաշտպանը:
Սակայն կողմերը չառարկեցին, ինչպես նաեւ տուժողի իրավահաջորդը ցանկություն հայտնեց, որ իրենց ներկայացուցիչը լինի Ա.Սաքունցը:
Կարդացեք նաև
Մեղադրողը հրապարակեց մեղադրական եզրակացության եզրափակիչ մասը:
Լիլիթ Վարդանյանը չընդունեց իրեն մեղսագրվածը, իսկ Զարինե Այվազյանն էլ ասաց, որ պարզ չէ, թե ինչի համար է մեղադրվում:
Ամբաստանյալի պաշտպան Երեմ Սարգսյանը հղում արեց ՀՀ քրեական դատավարության օրենսգրքի 394 հոդվածին, ասելով, որ օրենսդիրը պատահական չի նշել, որ պարզաբանման պարտականությունը դրված է դատախազի վրա, եւ հենց այս փուլում:
Դատախազն ասաց, որ նախաքննության ժամանակ պաշտպանական կողմի միջնորդություններում վիճարկվել է ոչ թե մեղադրանքը, թե ինչումն են մեղադրվում, այլ փորձագետների հետ կապված առանձին վերլուծությունները:
Տուժողի իրավահաջորդ Գեւորգ Միսակյանը դիմեց դատարանին, թե. «կարող եմ բացատրել, թե ինչումն է մեղադրվել: Արյան պատասխանը չեմ տեսել, արե՞լ եք, որ չեք տեսել», սակայն դատավորն ընդհատեց իրավահաջորդին, ասելով, որ դատական քննության ժամանակ կպարզվի:
Որոշվեց ապացույցների հետազոտման կարգը: Վաղը նշանակված դատական նիստին կլսեն տուժողի իրավահաջորդին, նախ վկայի կարգավիճակով, ապա վկաներին, կհետազոտվեն գործում եղած ապացույցները, փորձագետներին, ու ամբաստանյալներին:
Այսօր դատարան էին ներկայացել փորձագետը, վկաները, որոնք հեռացվեցին նիստերի դահլիճից:
Տուժողի իրավահաջորդի ներկայացուցիչ Արթուր Սաքունցն ասաց, որ մեղադրական եզրակացությունը չեն ստացել, դատարանից խնդրեց նաեւ այլ փաստաթղթեր էլ , որոնք իրենց չէին տրամադրվել մինչ այսօր:
Դատական նիստերի դահլիճոմ տուժուղի մայրն էր, հարազատները, բժիշկներ, իսկ լրագրողների վկայականներն էլ տեսանկարահանման թույլտվությունը տալուց առաջ մեկ- մեկ ստուգեց եւ բարձրաձայնեց դատավորը:
Ռուզան ՄԻՆԱՍՅԱՆ
