«Կարծում եմ, որ ցանկացած երաժշտական մրցանակաբաշխության ժամանակ մարդիկ քվեարկում են երաժշտության և կատարողական մատուցման որակի համար»,-հարցին՝ արդյոք «Եվրատեսիլ-2014»-ին քվեարկեցին գաղափարախոսությա՞ն օգտին, այսպես պատասխանեց Երևանում Եվրոպայի խորհրդի (ԵԽ) գրասենյակի ղեկավար Օլեքսանդր Պավլյուկը:
Նշենք, որ քննադատությունների և զարմանքի տեղիք տվեց այն, որ «Եվրատեսիլ 2014»-ի հաղթող ճանաչվեց Ավստրիան ներկայացնող Կոնչիտա Վյուրստը:
Օլեքսանդր Պավլյուկը շարունակելով պատասխանը՝ նշեց. «Ես ջազ և ազգային երաժշտության երկրպագու եմ և ոչ թե փոփ երաժշտության: Տեղյակ եմ, որ ՀՀ մասնակիցն այս մրցույթում զբաղեցրել է չորրորդ տեղը, որը բարձր ցուցանիշ է և հուսով եմ, որ առաջիկայում ՀՀ կատարողական արվեստը ներկայացրած արտիստները կկարողանան հասնել բարձունքների»:
Տաթև ՀԱՐՈՒԹՅՈՒՆՅԱՆ
